އެމްޑީޕީގެ ރިޔާސީ ޕްރައިމަރީއަށް ކުރިމަތިލެއްވި އެޕާޓީގެ އިސް ލީޑަރު، ރައީސް އިބްރާހިމް މުހައްމަދު ސޯލިހާއި ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދުގެ ކެންޑިޑެންސީ ބަލައިގަނެ، ކެންޑިޑޭޓް ނަންބަރު އެޕާޓީން މިއަދު ތަރުތީބުކޮށްފި އެވެ.
އެގޮތުން އެމްޑީޕީން ކުރި އިއުލާންގައި ވަނީ އިންތިޚާބުގައި ވާދަކުރައްވާ ކެނޑިޑޭޓުގެ ނަމާއި ކެނޑިޑޭޓް ނަންބަރު އާންމުކޮށްފައިވާކަމަށެވެ.
1 މުހައްމަދު ނަޝީދު (ގ ކެނެރީގެ/ މާލެ)
2 އިބްރާހީމް މުހައްމަދު ޞާލިހް (ނޫރާނީއާގެ / ޅ ހިންނަވަރު)
އަންނަ އަހަރު ބާއްވާ ރިޔާސީ އިންތިހާބުގައި ވާދަކުރާނެ ކެންޑިޑޭޓެއް ހޮވުމަށް އެމްޑީޕީން ބާއްވާ ރިޔާސީ ޕްރައިމަރީ ބޭއްވުމަށް ތާވަލުކޮށްފައިވަނީ އަންނަމަހުގެ 28 ވަނަ ދުވަހުއެވެ. .
އެމްޑީޕީގެ ތާރީހުގައި މިހާތަނަށް އަންނާނެ އެންމެ ވާދަވެރި އިންތިހާބުގައި ވާދަ ކުރެއްވުމަށް ރައީސް ސޯލިހް ފޯމު ހުށަހަޅާފައިވަނީ 20،000 އަށް ވުރެ ގިނަ މެންބަރުންގެ ތާއީދާއެކު އެވެ. ނަޝީދު ފޯމު ހުށަހަޅުއްވާފައި ވަނީ ބޭނުންވާ އަދަދަށް 500 މެންބަރުންގެ ތާއީދާ އެކު އެވެ.
އެމްޑީޕީ އަކީ ރާއްޖޭގެ އެންމެ ގިނަ ދުވަސްވީ އެންމެ ބޮޑު ސިޔާސީ ޕާޓީ އެވެ. މިވަގުތު އެޕާޓީގެ ދަފްތަރުގައި 58،000 މެމްބަރުން އެބަ ތިއްބެވެ.
ނަމަވެސް ނަޝީދު ވަނީ އެމްޑީޕީގެ ގިނަ މެންބަރުންތަކެއް ރައީސް ސޯލިހު ވަކިކުރެއްވި ކަމަށް ތުހުމަތުކޮށް ޕާޓީގެ ދަފުތަރު ގަޑުބަޑުވެފައިވާ ކަމަށް ވިދާޅުވެފަ އެވެ. ނަޝީދުގެެ އެ ތުހުމަތުތައް ދޮގުކޮށް ނެރުނު ބަޔާނެއްގައި އެމްޑީޕީއިން ބުނީ އެ ޕާޓީގެ ދަފުތަރަކީ ޕާޓީގެ އަސާސީ ގަވާއިދާ އެއްގޮތަށް ބަލަހައްޓަމުންދާ ދަފުތަރެއް ކަމުގައި ބުނެފަ އެވެ.
ކޮމެންޓްސް (0)