ސްޕެނިޝް ކަޕްގެ ޗެމްޕިއަންކަން ބާސެލޯނާ ހޯދައިފި

ސްޕެނިޝް ކަޕްގެ ޗެމްޕިއަންކަން ބާސެލޯނާ ހޯދައިފިއެވެ

ބާސެލޯނާ މިމުބާރާތުގެ ޗެމްޕިއަންކަން ހޯދީ ފައިނަލްގައި ސެވިއްޔާ 5 ލަނޑު 0 ލަނޑުގެ ބޮޑުތަފާތަކުން ބަލިކުރުމަށްފަހުގައެވެ

ހޮނިހިރު ދުވަހުގެރޭ ކުޅެވުނު މިމުބާރާތުގެ ފައިނަލްމެޗްގައި ބާސެލޯނާއިން ކާމިޔާބުކުރި ފަސްލަނޑުގެ ތެރެއިން ފުރަތަމަ ލަނޑު 14 ވަނަ މިނިޓްގައި ކާމިޔާބުކޮށްދިނީ ސުއަރޭޒްއެވެ. ބާސެލޯނާގެ ދެވަނަ ލަނޑު 31 ވަނަ މިނިޓްގައި ކާމިޔާބުކޮށްދިނީ މެސީއެވެ. އަދި އެޓީމުގެ 3 ވަނަ ލަނޑު 40 ވަނަ މިނިޓްގައި ކާމިޔާބުކޮށްދީފައިވަނީ ސުއަރޭޒްއެވެ.

މިމެޗްގައި ބާސެލޯނާއިން ކާމިޔާބުކުރި 4 ވަނަ ލަނޑު 52 ވަނަ މިނިޓްގައި އިނިއެސްޓާ ކާމިޔާބުކޮށްދީފައިވާއިރު އެޓީމުގެ ފަސްވަނަ ލަނޑު 67 ވަނަ މިނިޓްގައި ކާމިޔާބުކޮށްދިނީ ކޫޓީނިއޯއެވެ.

ސްޕެނިޝް ކަޕްގެ އެންމެ ކާމިޔާބު ޓީމު ކަމަށްވާ ބާސެލޯނާއިން މި އަހަރު މިމުބާރާތް ކާމިޔާބު ކުރުމާއެކު އެ ޓީމު ވެފައިވަނީ ޖެހިޖެހިގެން 4 އަހަރު މުބާރާތް ކާމިޔާބު ކުރި ހަމައެކަނި ޓީމަށްވެފައެވެ.

އަދި މި ފަހަރުގެ ތަށްޓާއެކު ބާސެލޯނާއިން ސްޕެނިޝް ކަޕް ކާމިޔާބު ކުރި އަދަދު ވަނީ 30 އަށް އަރާފައެވެ. ބާސެލޯނާއި އެންމެ ގާތުގައި މިމުބާރާތް ކާމިޔާބުކުރެވިފައިވާ  އެތުލެޓިކް ކްލަބަށް މިމުބާރާތް ކާމިޔާބު ކުރެވިފައިވަނީ 23 ފަހަރެވެ.