އިންޑިއާގައި މަޝްހޫރުކަން ހޯދަމުން އަންނަ ސަނީ ލިއޯން މިހާރު ތައްޔާރުވަމުން އަންނަނީ ތެލަގޫ ބަހުން އުފައްދާ ހަނގުރާމަ އާއި ގުޅޭ ޑްރާމާތައް ދައްކުވައިދޭ ފިލުމެއް ކުޅުމަށް ކަމަށް އޭނާ ބުނެފި އެވެ.
ބޮލީވުޑްގެ ފިލުމުތަކާއި ލަވަތަކުން ފުރުސަތު ލިބެމުން އަންނަ ސަނީ ލީއޯން އެކްޓު ކުރުމަށް ހަމަޖެހިފައިވާ މި ފިލުމު ޑައިރެކްޓް ކުރާނީ ވީ ސީ ވަޑިވުޑަޔަން އެވެ.
މި ފިލުމުގައި ދައްކުވައިދޭނީ ދެކުނު އިންޑިއާގެ ސަގާފަތްތަކާއި، ހަނގުރާމައެއްގެ ތެރޭގައި ކާމިޔާބު ހޯދާ އަންހެނަކަށް ދިމާވާ ގޮންޖެހުންތަކެވެ.
މި ފިލުމުގެ ލީޑް ރޯލު ކުޅުމަށް ސަނީ ލިއޯނަށް ހުށަހަޅާފައިވާއިރު، ކަނޑި ހަނގުރާމަ އާއި އަސް ދުއްވުން ފަދަ އިންޑިއާގެ ތާރީހާ ގުޅޭ ކަންތައްތައް އޭނާ ދަސްކުރާނެ އެވެ.
ސަނީ ލިއޯން ޝޯއެއްގައި ނަށަނީ – ފޮޓޯ: އޭއެފްޕީ
މި ރޯލާ ގުޅޭ ގޮތުން ސަނީ ލިއޯން ބުނީ މިފިލްމުގައި އޭނާ އަދާކުރާ ރޯލުގެ ސަބަބުން އޭނާގެ ‘އޮން ސްކްރީން އިމޭޖް’ މުޅިން ބަދަލުކޮށްލާނެ ކަމަށެވެ. މި ފިލްމާ މެދު ވަރަށް ހިތްހަމަ ޖެހޭ ކަމަށާއި، ވަރަށް އަވަހަށް މި ފިލްމުގެ ހުށަހެޅުމަށް އެއްބަސްވި ކަމަށްވެސް ސަނީ ލިއޯން ބުންޏެވެ. އަދި ޑައިރެކްޓަރު ސްކްރިޕްޓް ކިޔާދިން ހިސާބުން ފެށިގެން މިފިލްމު ކުޅުމަށް ތައްޔާރުވާން ފަށާފައިވާ ކަމަށާއި، ދެކުނު އިންޑިއާއަށް އޭނާގެ ހިތުގައި ހާއްސަ ލޯތްބެއް އުފެދިފައިވާ ކަމަށްވެސް ސަނީ ލިއޯން ބުންޏެވެ.
ިފިލްމީ ދާއިރާގައި އިންތިޒާރު ކުރަމުން އައި ފަދަ ސްކްރިޕްޓެއް އަދި މި ލިބުނީ ކަމަށާއި، ތެލަގޫ ފިލުމެއް ކުޅެން ފުރުސަތު ލިބުނީތީ ވަރަށް އުފާވާ ކަމަށްވެސް ސަނީ ލިއޯން ބުންޏެވެ. އޭނާގެ ވަރަށް ގިނަ ފޭނުން ދެކުނު އިންޑިއާގައި އުޅޭ އިރު، އަންދްރަ ޕްރެދޭޝް އާއި، ޓެމިލް ނާޑޫ އަދި ކެރެލާގައިވެސް އޭނާގެ ފޭނުން ގިނަ ކަމަށް ސަނީ ލިއޯން ބުންޏެވެ.
ކޮމެންޓްސް (0)