އައްޑޫ ޓާޝަރީ ހޮސްޕިޓަލުގައި ބޭނުންކުރުމަށް ގެނައި އެމްއާރުއައި މެޝިން އައްޑުއަށް ގެނެސްފި

އައްޑޫ ޓާޝަރީ ހޮސްޕިޓަލުގައި  ބޭނުންކުރުމަށް ގެނައި އެމްއާރުއައި މެޝިން އައްޑުއަށް ގެނެސްފިއެވެ.

މިއެމްއާރުއައި މެޝިން ގަމަށް ގެނެސްފައިވަނީ ދުނިޔޭގެ އެންމެ ބޮޑެތި ކާގޯ އުފުލާ މަތިންދާބޯޓުތަކުގެ ތެރޭގައި ހިމެނޭ މަތިންދާބޯޓެއްގައި ރޭފަތިހުއެވެ.

ދިވެހި ސަރުކާރުން ޗާޓަރުކޮށްގެން  ދުބާއީން ފުރައިގެން ގަމަށް އައި  ކާގޯ މިމަތިންދާބޯޓުން އައްޑޫގެ ކޮންވެންޝަން ސެންޓަރުގައި ހަދަމުންދާ 100 އެނދުގެ ހޮސްޕިޓަލަށް ބޭނުންވާ އެމްއާރުއައި މެޝިނުގެ އިތުރަށް އެ ހޮސްޕިޓަލަށް ބޭނުންވާ  ގިނަ ސާމާނު ތަކެއް ގެންސްފައިވާ ކަމަށް މައުލޫމާތު ލިބިފައިވެއެވެ.

ސާކް ސަމިޓް ބޭއްވުމަށް އައްޑޫގައި އެޅި އީކުއެޓޯރިއަލް ކޮންވެންޝަން ސެންޓަރު (އީސީސީ) އަށް ބަދަލުތަކެއް ގެނައުމަށް ފަހު އެތަނުގައި ތައްޔާރު ކުރަމުންދާ  100 އެނދުގެ ޓާޝަރީ ހޮސްޕިޓަލްގެ މަސައްކަތް ނިންމާ މިއަހަރުގެތެރޭގައި އެ ހޮސްޕިޓަލުގެ ޚިދުމަތް ދޭންފެށޭނެކަމަށް ސަރުކާރުންވަނީ ހާމަކޮށްފައެވެ.

މި ހޮސްޕިޓަލް ނިމޭއިރު އެތަނުގައި އެމްއާރުއައި އަދި ސީޓީ ސްކޭންގެ ހިދުމަތާއި، ފަސް އޮޕަރޭޝަން ތިއޭޓަރުގެ އިތުރުން މޯޗަރީ އަކާއި ޕްރައިވެޓް ރޫމްތައް ވެސް ހުންނާނެ ކަމަށް ހެލްތު މިނިސްޓަރީން މީގެ ކުރީންވަނީ ހާމަކޮށްފައެވެ.

އީސީސީގައި ތައްޔާރު ކުރަމުންދާ  ހޮސްޕިޓަލުގެ މަސައްކަތްކުރުމަށް ސައުދީ ފަންޑުން 12.5 މިލިއަން ޑޮލަރު ހަމަޖެހުނުކަމަށާ  އަދި އޯޕެކް ފަންޑުން 8.4 މިލިއަން ޑޮލަރު ހަމަޖެހުނުކަމަށް ކުރީގެ ސަރުކާރުންވަނީ ހާމަކޮށްފައެވެ.

ހެލްތު މިނިސްޓަރު އަމީން ވަނީ ޓާޝަރީ ހޮސްޕިޓަލަކަށް އައްޑޫ ރައްޔިތުން ކުރާ އުއްމީދު ހަގީގަތަކަށް ހައްދަވާނެ ކަމަށްވިދާޅުވެފައެވެ.   އަދި ހޮސްޕިޓަލްގެ  މަސައްކަތް ކުރިއަށްދާގޮތްވެސް މިނިސްޓަރު އަމީން އައްޑުއަތޮޅަށް ވަޑައިގެންވަނީ ބައްލަވާ ލައްވާފައެވެ.