އައްޑޫ ސިޓީގެ ގުޅިފައިވާ ރަށްތަކަށް ކަރަންޓުގެ ޚިދުމަތް ދިނުމުގައި ދިމާވެފައިވާ ފަންނީ މައްސަލައެއްގެ ސަބަބުން، ލޯޑު ބޮޑުވާ ބައެއް ވަގުތުތަކުގައި ކަރަންޓުގެ ޚިދުމަތް ކެނޑިދާނެކަމަށް ފެނަކަ ކޯޕަރޭޝަނުން ބުނެފިއެވެ.
ފެނަކަ ކޯޕަރޭޝަނުން ބުނީ އައްޑޫސިޓީގެ ގުޅިފައިވާ ރަށްތަކަށް ކަރަންޓް ފޯރުކޮށްދެމުންދާ ޖަނެރޭޓަރަކަށް މައްސަލަ ޖެހިފައިވާތީ ކަމަށާއި މިހާރުވެސް މަރާމާތުކުރުމުގެ މަސައްކަތްކުރަމުންދާކަމަށެވެ. ފެނަކަ ކޯޕަރޭޝަނުން ބުނީ އައްޑޫސިޓީގެ ރަށްތަކަށް ކަރަންޓު ދިނުމަށް ބޭނުންކުރަމުން އައި އިންޖީނުތަކުގެ ތެރެއިން ދެ މެގަވޯޓުގެ ޖަނަރޭޓަރަކަށް މިމަހުގެ 14 ވަނަ ދުވަހު މައްސަލައެއް ދިމާވެފައިވާ ކަމަށެވެ. އަދި މަރާމާތު ކުރުމުގެ މަސައްކަތް ކުރިޔަށްދާތީ ހެނދުނުން ފެށިގެން އެކި ޞަރަޙައްދުތަކުން ގިނަ އިރުތަކަށް ކަރަންޓު ކަނޑަމުންދާނެކަމަށެވެ. ލޯޑް މަތިވާ ގަނޑިތަކުގައި ކަރަންޓް ކަނޑަންޖެހިދާނެ ކަމަށެވެ.
ޖަނަރޭޓަރަށް ދިމާވެފައިވާ މައްސަލަ ޙައްލު ކުރެވެންދެން މަތީ ލޯޑް ނަގާ އިލެކްޓްރޯނިކް ސާމާނު ބޭނުންކުރުން މަދުކުރުމަށް ފެނަކައިން ވަނީ އިލްތިމާސްކޮށްފައެވެ. އަދި މިދަނޑިވަޅުގައި އައްޑޫ ސިޓީގެ ރައްޔިތުންގެ ކެތްތެރިކަން ފާހަގަކޮށް، ފެނަކައަށް އެއްބާރުލުން ދެމުންދާތީ އެކުންފުނިން އެކަން ފާހަގަކުރެއެވެ.
ކޮމެންޓްސް (0)