އައްޑޫގެ ކާފިއު އިތުރު ހަފްތާއަކަށް ދަންމާލައިފި

އައްޑޫ ސިޓީގެ ގުޅިފައިވާ ރަށްތަކުގައި ހަލުވިކަމާއެކު ކޮވިޑް19 ފެތުރެމުން އަންނާތީ އެ ރަށްތައް ބަންދު ކޮށްފައިވާ މުއްދަތު އިތުރުކޮށްފިއެވެ.

އައްޑޫ ސިޓީ އިން ކޮންމެ ދުވަހަކުވެސް ކޮވިޑަށް ޕޮޒިޓިވްވާ މީހުންގެ އަދަދު އަންނަނީ އިތުރުވަމުންނެވެ. އައްޑޫ ސިޓީގެ ގުޅިފައިވާ ރަށްތައް ބަންދު ކުރީ މިދިޔަ މަހުގެ 28ވަނަ ދުވަހުއެވެ.

ކޮވިޑް 19ގެ ހާލަތާއި ގުޅިގެން އެޗް. ޕީ. އޭއިން އައްޑޫ ސިޓީ ހިތަދޫ، މަރަދޫ، މަރަދޫފޭދޫ އަދި ފޭދޫގެ މޮނިޓަރިންގް މުއްދަތު 11 ސެޕްޓެމްބަރ 2021 ވަނަ ދުހުގެ 00:00 އިން 1 ހަފްތާގެ މުއްދަތަށް އިތުރުކުރުމާއި ގުޅިގެން އައްޑޫ ސިޓީ ކައުންސިލުން ނެރޭ އިއުލާން! pic.twitter.com/CPLBoEkAG4

— Addu Emergency Operations Center (@EOCaddu) September 11, 2021

އެގޮތުން ރޭގަނޑު 21:00 އިން ފެށިގެން ފަތިހު 4:00 އަށް ކާފިއު އެ ސިޓީގައި އަންނަނީ ހިންގަމުންނެވެ. އައްޑޫ ސިޓީ ކައުންސިލުން ރޭ ބުނީ އައްޑޫގައި ބަލީގެ ހާލަތު އޮތް ގޮތުން ކާފިއުގެ މުއްދަތު އިތުރު ހަފްތާއަކަށް ދަންމާލުމަށް ނިންމާފައިވާ ކަމަށެވެ.

އައްޑޫ ސިޓީ މޮނީޓަރިންގައި އޮތްއިރު މީގެ ކުރިން ދެ މަސް ދުވަސް ވަންދެން އައްޑޫ މޮނީޓަރިންގައި އޮތެވެ. ދެމަސް ދުވަސް ފަހުން އައްޑޫ ސިޓީ މޮނީޓަރިންގެ ހާލަތުން ނެގީ މިދިޔަ މަހުގެ 19ވަނަ ދުވަހުއެވެ.

އައްޑޫގެ އެކްޓިވް ކޭސްތަކުގެ އަދަދު 300 އަށްވުރެ މައްޗަށް އަރާފައިވާއިރު ފަސް މީހަކަށް ހޮސްޕިޓަލުގައި އަންނަނީ ފަރުވާ ދެމުންނެވެ.