ކޮރޯނާ ވައިރަސް ފެތުރެމުން ދާތީ ފެނަކަ ކޯޕަރޭޝަންގައި މަސައްކަތްކުރާ މާބަނޑު އަންހެނުން ގޭގައި ތިބެ މަސައްކަތް ކުރެވޭނެ އިންތިޒާމް ހަމަޖައްސާފައިވާ ކަމަށް ފެނަކަ ކޯޕަރޭޝަނުން ހާމަކޮށްފިއެވެ.
ފެނަކަ އިން މިއަދު ކުރި ޓްވީޓެއްގައި ހާމަކޮށްފައިވާގޮތުން މިވަގުތު ދުނިޔެއަށް ކުރިމަތިވެފައިވާ ކޮވިޑް-19 ގެ ނުރައްކަލުން ދިވެހި ރައްޔިތުން އަދި ހާއްސަކޮށް ފެނަކައިގެ މުވައްޒަފުންނަށް ރައްކާތެރިކަން ކަށަވަރު ކޮށްދިނުމުގެ ބޭނުމުގައި އާދީއްތަ ދުވަހުން ފެށިގެން ކޮންމެ ދުވަހެއްގައިވެސް އެކުންފުނީގެ މަސައްކަތް ކީރިތި ޤުރާއާނުގެ ބަރާކަތުން ފެށުމަށާއި އަދި ބަލިމަޑުކަމުން ދިންނެވުން އެދި ކުރާ ދުޢާ އަކުން މަސައްކަތް ފެށުމަށް ކުންފުނީގެ މެނޭޖިން ޑިރެކްޓަރ އަހްމަދު ސައީދު ނިންމަވާފައިވާކަމަށް ފެނަކައިގެ ޓުވިޓްގައި ހާމަކޮށްފައިވެއެވެ.
ސަރުކާރުން ވެސް މިހާރު ގެންދަވަނީ ކޮވިޑް-19 ރާއްޖޭގައި އިތުރަށް ފެތުރެން ފަށައިފިނަމަ މުވައްޒަފުން ގޭގައި ތިބެގެން މަސައްކަތް ކުރެވޭނެ އިންތިޒާމްތައް ހަމަޖައްސަމުންނެވެ.
ރާއްޖެ އިން ވެސް މިހާރު ވަނީ ކޮވިޑް-19 ފެނިފައެވެ. ރާއްޖެ އިން މިހާތަނަށް އަށް މީހުން ކޮވިޑް-19 އަށް ޕޮޒިޓިވް ވެފައި ވެއެވެ. އަދި 16 މީހަކު ވިލިވަރުގައި ކަރަންޓީން ކޮށްފައި އެބަތިއްބެވެ. މީގެ އިތުރުން 09 މީހަކު ފަރުކޮޅުގައި އެކަހެރި ކޮށްފައި އެބަތިއްބެވެ. އަދި ބައެއް މީހުން ރިސޯޓްތަކާއި، މީހުން ދިރިއުޅޭ ރަށްރަށުގައި އެމީހުން ދިރިއުޅެމުން އަންނަ ތަންތަނުގައި އެކަހެރިކޮށް ތިބުމަށް އަންގާފައި ވެއެވެ.
ކޮމެންޓްސް (0)