އދ.ދަނގެތީގައި މީހަކު މަރާލުމަށް ފަހު ގޯންޏަކަށްލައި ވަޅަކަށް އެއްލާލާފައި އޮއްވައި ފެނިއްޖެއެވެ.
އެރަށުން ވާހަކަ ދެއްކި މީހަކު ބުނިގޮތުގައި އެ މީހާ ގެއިން ބޭރަށް ނުކުތީ ރޭ ކުޅުނު ދިވެހިރާއްޖެ/ އިންޑިއާ މެޗް ބެލުމަށް ފަހުގައި ކަމަށެވެ. އެ މީހާ އޭގެފަހުން ގެއަށް ނައިސްގެން ކައުންސިލަށް އަންގާފައިވަނީ މިއަދު ހެނދުނު 9:00 ހާއިރު ކަމަށެވެ.
އެރަށުގައި ވިޔަފާރިވެސް ކުރާ 55 އަހަރުގެ އެ ފިރިހެން މީހާ ފެނިފައިވަނީ ކައުންސިލާއި، ރައްޔިތުން ނުކުމެ ހޯދަމުން ދަނިކޮށް މެންދުރުފަހު 3:15 ހާއިރުކަމަށް އެރަށުން ވާހަކަ ދެއްކި މީހާ ބުންޏެވެ.
މަހްމޫދު އަބޫބަކުރު ނަމަކަށް ކިޔާ އެ މީހާގެ ހަށިގަނޑު ފެނިފައިވަނީ ގޯންޏަކަށް ލައި، ތުން ބަނދެފައި ފަޅު ގޯއްޗެއްގައި ހުރި ވަޅަކަށް ވައްޓާލާފައި އޮއްވައެވެ.
އެ ސަރަހައްދުގައި ޓޭޕްދަމައި، އެރަށުގައި މަސައްކަތްކުރާ ފުލުހުން ހަރަކާތްތެރިވަމުން ދާއިރު، އެ އަތޮޅު މަހިބަދޫ އިން ފުލުހުންގެ ޓީމެއް މިހާރުދަނީ ދަނގެއްޗަށް ދަތުރުކުރަމުންނެވެ
ކޮމެންޓްސް (0)