ހަރުކަށި ފިކުރުގެ މީހެއް މާލެއިން ހައްޔަރު ކޮށްފި

ހަރުކަށި ފިކުރު ފެތުރުމުގައި އިސްކޮށް ހަރަކާތްތެރި ވާ މީހަކު ހައްޔަރު ކޮށްފައި ވާކަމަށް ފުލުހުންގެ އިދާރާއިން ބުނެފިއެވެ.

ފުލުހުންގެ އިދާރާއިން މިރޭ ބުނީ، ފުޅާ ދާއިރާއެއްގައި ހަރުކަށި ފިކުރު ފެތުރުމުގެ މަސައްކަތް ކުރަމުންދިޔަ ކަމުގެ ތުހުމަތުގައި މާލެއިން  އުމުރުން 49 އަހަރުގެ ފިރިހެނަކު ހައްޔަރު ކޮށްފައި ވާކަމަށެވެ.

އެހެން ނަމަވެސް އެމީހާ އާއި ބެހޭ ގޮތުން އިތުރު އެއްވެސް ތަފްސީލެއް ފުލުހުން ހާމަ ކޮށްފައި ނުވެއެވެ.

އޮންލައިން ނޫސް “މިހާރު” އިން ރިޕޯޓްކޮށްފައިވާ ގޮތުގައި ފުލުހުން މިރޭ ހައްޔަރުކޮށްފައިވަނީ, 2007 ވަނަ އަހަރު އއ. ހިމަންދޫގައި ހަރުކަށި ފިކުރު ފަތުރައި ސަލާމަތީ ބާރުތަކާ ދެކޮޅަށް ހަމަލާ ދިނުމުގައި އިސްކޮށް އުޅުނު މައްސަލާގައި ހައްޔަރުކޮށް ހުކުމް ތަންފީޒުކޮށްފައިވާ އަބްދުﷲ އަލިމަނިކެވެ.

ހަރުކަށި ފިކުރުގެ މީހަކު ފުލުހުން ހައްޔަރުކޮށްފައިވާއިރު، ހަރުކަށި ފިކުރުމުގެ އަދި މީހުން މެރުމަށް ފަސްނުޖެހޭނެ 1000އަށް ވުރެ ގިނަ މީހުން ރާއްޖޭގައި އެބަތިބިކަމަށް ފުލުހުން ހާމަކުރައްވާފައިވެއެވެ.

ރާއްޖޭގައި ހަރުކަށި ފިކުރުގެ މައްސަލަ ބޮޑުވެފައިވާއިރު، މިމަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިޒަމްގެ ހަމަލާއާއި ގުޅިގެން ހައްޔަރުކޮށްފައިވާ މީހުންނަކީވެސް ހަރުކަށި ފިކުރާ ގުޅިފައިވާބައެއްކަމަށް ފުލުހުން ބުނެފައިވެއެވެ. ދާދި ފަހުން ފުލުހުން ނާއި ސިފައިން ގުޅިގެން އައްޑޫ ސިޓީގައި ހިންގި ޚާއްޞަ އޮޕަރޭޝަނެއްގައިވެސް އައިއެސް ޖަމާއަތައި ގުޅުންހުރިކަމަށް ތުހުމަތުކުރެވޭ 7 މީހަކު ވަނީ ހައްޔަރުކޮށްފައެވެ.