ކޮމިޝަނަރ ޖެނެރަލް އޮފް ކަސްޓަމްސްގެ މަގާމުގައި ހުންނެވި ސ. ހިތަދޫ ޖަނަވަރީމާގޭ އަހްމަދު ނުއުމާން މިއަދު އަވަހާރަވެއްޖެއެވެ.
އަހްމަދު ނުއުމާން ކޮމިޝަނަރ ޖެނެރަލް އޮފް ކަސްޓަމްސްގެ މަގާމަށް އައްޔަން ކުރައްވާފައިވަނީ 11ޑިސެމްބަރު 2018 ގައެވެ. ނުއުމާން އަވަހާރަވީ ކިޑްނީ ޓްރާންސްޕްލާންޓް އޮޕަރޭޝަނެއް ކުރައްވަން އިންޑިއާ އަށް ވަޑައިގެން އުޅުއްވަނިކޮށް ކަމަށް މައުލޫމާތުލިބިފައިވެއެވެ.
އަދި ކިޑްނީގެ އާލާސްކަންފުޅަށް ފަރުވާ ހޯދުމަށް ނުއުމާން އިންޑިއާގައި އުޅުއްވާތާ އަށެއްކަ މަސްވެއްޖެ ކަމަށް ބައެއް މީޑިއާތަކުން ވަނީ ރިޕޯޓްކޮށްފައެވެ.
ނުއުމާން އަކީ އަދާލަތު ޕާޓީގެ އިންސާނީ ހައްގުތަކާއި ބެހޭ ކޮމިޓީގެ ރައީސް އެވެ.
ނުއުމާން ވަނީ ފެނަކަ އުފެއްދިއިރު އެ ކުންފުނީގެ ޗެއާމަންގެ މަގާމުގެ އިތުރުން ސްޓެލްކޯ އާއި ހައުސިން މިނިސްޓްރީގައި ވެސް ކުރިން މަސައްކަތް ކުރައްވައިފަ އެވެ. އެ ތަންތަނުގެ އިތުރުން ދިވެހިރާއްޖޭގެ ގައުމީ ޔުނިވަސިޓީގައި ވެސް ނުއުމާން މަސައްކަތް ކުރެއްވި އެވެ.
ނުއުމާން އަވަހާރަވިއިރު، ދެ ފިރިހެން ބޭފުޅުންނާއި އަނބިކަނބަލުން ދުނިޔޭގައި އެބަހުންނެވި އެވެ.
ކޮމެންޓްސް (0)