ރޮޒޭއަކީ އަޅުގަޑުމެންގެ ވައުތުތަކަށް ފުރިހަމައަށް ތާއީދުކޮށްގެން ހުންނެވި އެކަން ގަބޫލްކުރާ ބޭފުޅެއްކަމަށާ އަޅުގަޑުމެންގެ މެނިފެސްޓޯ ތަންފީޒުކުރުމާއި އެޖެންޑާ19 ތަންފީޒުކުރުމަށްޓަކައި ރަށްޔިތުންގެ މަޖިލިހުގައި ރޮޒޭ އިންނަން ޖެހޭކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެވެ.
ރައީސް ސޯލިހު މިހެންވިދާޅުވީ މީދޫ ރަށްޔިތުންނާއި ބައްދަލުކުރުމަށް މިމަހުގެ 9 ވަނަ ދުވަހު މީދޫ ޝަމްސުއްދީން ސްކޫލްގައި ބޭއްވުނު ބައްދަލުވުމެއްގައި ވާހަކަފުޅު ދައްކަވަމުންނެވެ.
ރޮޒޭއަކީ ރަށްޔިތުންގެ މަޖިލިހުގެތޭގައި ރަށްޔިތުން ތަމްސީލްކުރުމަށްޓަކައި ކުރަންޖެހުނު ކޮންމެ ކަމެއް ވޭތުވެދިޔަ ދެދައުރުގައިވެސް ފަހަތަށް ޖެހިވަޑައިނުގެން ކުރައްވާފައިވާ ކުޅަދާނަ އަންހެން ބޭކަބަލެއްކަމަށް ވިދާޅުވެ ވާހަކަފުޅު ދައްކަވަމުން ރައީސް ސޯލިހު ވިދާޅުވީ ރޮޒޭއަކީ މަޖިލިހުގައި މިދާއިރާގެ އަދި މުޅި ރާއްޖެ ތަމްސީލް ކުރުމުގައި ފަހަތަކަށް ޖެހިވަޑައި ނުގެން މަސައްކަތް ކުރައްވަމުން ގެންދާ ބޭފުޅެއްކަމަށެވެ.
” ތިޔަބޭފުޅުންނަށް އަޅުގަޑު އިޚްލާސްތެރިކަމާއެކު މިއިލްތިމާސްކުރަނީ ރޮޒޭއަށް ވޯޓް ދެއްވުމަށް . ރޮޒޭއަށް ދެއްވާ ވޯޓަކީ ގެއްލިގެންދާނެ ވޯޓެއްނޫން. އަޅުގަޑު ރޮޒޭއާއެކު ރަށްޔިތުންގެ މަޖިލިހުގައި 2 ދައުރުގައި މަސައްކަތްކޮށްފިން . އަންހެން ބޭކަބަލެއް އެހެންނަމަވެސް އަޅުގަޑުމެންގެ ސަފުގައި ފަހަތަކަށް ޖެހިވަޑައިނުގަންނަވާ .ރަށްޔިތުން ތަމްސީލްކުރުމުގައި ކުރަންޖެހޭ ކޮންމެކަމެއް އެންމެކުރީ ސަފުގައި ހުންނަވައިގެން އެގެންދަވަނީ ކުރައްވަމުން . މިއަދުވެސް އެހުންނެވީ އެގޮތައް . އަޅުގަޑުގެ ފުރިހަމަ އިތުބާރު އެބައޮތް ކުރިއަށްއޮތް ރަށްޔިތުންގެ މަޖިލިހުގައިވެސް މިދާއިރާގެ އަދި މުޅި ރާއްޖެ ތަމްސީލް ކުރުމުގައި ރޮޒޭ ފަހަތަކަށް ޖެހިވަޑައި ނުގަންނަވާނެކަމަށް. ” ރައީސް ސޯލިހު ވިދާޅުވިއެވެ.
މިބައްދަލުވުމުގައި އިތުރަށް ވާހަކަ ފުޅުދައްކަވަމުން ރައީސް ސޯލިހު ވިދާޅުވީ މީދޫއާއި ހުޅުދޫއަށް ކޮށްދޭންޖެހޭ ބައިވަރު ކަންތައްތައް އެބަހުރިކަމަށާ އެކަންކަން އައްޑޫސިޓީގެ ތަރައްގީގެ މެގަޕްރޮޖެކްޓް ފެށިގެން ކުރިއަށްދާއިރުގައި ކުރެވިގެންދާނެކަމަށެވެ.
ކޮމެންޓްސް (0)