އިކޮނަމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒް އިސްމާއިލާއި ދެކޮޅަށް ދެން ނާރާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު މިހެން ވިދާޅުވީ ރާއްޖޭގެ ވެރިކަމުގެ ނިޒާމް ބަރުލަމާނީއަށް ބަދަލު ކުރަން ނަޝީދު ފަށާފައިވާ މަސައްކަތުގެ ކެމްޕެއިން މެނޭޖަރަކަށް ހަމަޖައްސާފައިވާ އިބްރާހިމް ވަހީދު އެމްޑީޕީގެ ކޮންގްރެސްގެ ކަންކަމުގައި އިސްކޮށް އުޅުއްވާތީ، ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) އެމްޑީޕީ ގައުމީ މަޖިލީހުގެ ވަޓްސްއެޕް ގްރޫޕްގައި ޝަކުވާ ކުރެއްވުމުންނެވެ.
އަނދުން ހުސެއިންގެ ޝަކުވާއާ ގުޅިގެން ފައްޔާޒާއި އަދި ގައުމީ މަޖިލީހުގެ ގިނަ މެމްބަރުން ވަނީ ކޮންގްރެސްގެ ކަންކަމުގައި އިބްރޭ އިސްކޮށް އުޅުއްވުމަކީ މައްސަލައެއް ކަމަށް ނުދެކޭ ކަމަށް ވިދާޅުވެފަ އެވެ. އަދި އަނދުން ހުސެއިނަށް ރައްދު ދެއްވަމުން ނަޝީދު ވަނީ ފައްޔާޒާއި ދެކޮޅަށް ކުރިން މަސައްކަތް ކުރެވުނީ އަނދުން ހުސެއިނާއި ހެދި ކަމަށް ވިދާޅުވެފަ އެވެ.
”އެއް ފަހަރު ހުސެއިން އަޅުގަނޑު ލައްވާ އެކަން ކުރުވި. އެއީ އަޅުގަނޑަށް ކުރެވުނު ގޯސް ކަމެއް.“
ނަޝީދު ވިދާޅުވި އެވެ.
ނަޝީދު ވަނީ ފައްޔާޒާއި އިދިކޮޅަށް ދެން ނާރުއްވާނެ ކަމަށް މިހާރު ބޭނުންފުޅުވަނީ އެކުގައި ކުރިއަށްދާން ކަމަށްވެސް ވިދާޅުވެފަ އެވެ.
އެމްޑީޕީގެ ޗެއާޕާސަންގެ އިންތިހާބުގެ ތެރޭގައި ފައްޔާޒަށް ތަފާތު އެކި ތުހުމަތުތައް ނަޝީދަށް ތާއީދުކުރައްވާ ފަރާތްތަކުން ގެންދެވީ ކުރައްވަމުންނެވެ. އެގޮތުން ނަޝީދު އެމްޑީޕީން ބޭރުކުރަން ފައްޔާޒު އުޅުއްވާ ކަމަށްވެސް ތުހުމަތު ކުރެއްވި އެވެ. ނަމަވެސް އެ ތުހުމަތުތައް ދޮގުކުރައްވަމުން ފައްޔާޒު އޭރުވެސް ވަނީ އެމްޑީޕީ ހިންގާލާނީ ނަޝީދާއެކު ކަމަށް ވިދާޅުވެފަ އެވެ.
ކޮމެންޓްސް (0)