އައު އަހަރަށް މަރުހަބާ ކިޔުމުގެ ގޮތުން މާލޭ ސިޓީގައި ހަވާ އެރުވުމަށް ހަމަޖެހިފައިނުވާކަމަށް މޯލްޑިވްސް ނެޝަނަލް ޑިފެންސް ފޯސް، އެމް.އެން.ޑީ.އެފުން ބުނެފިއެވެ.
އެމް.އެން.ޑީ.އެފްގެ މިޑިއާ އޮފިޝަލް އިބްރާހީމް އާޒިމް ވިދާޅުވީ، އައު އަހަރަށް މަރުޚަބާ ކިޔުމުގެ ގޮތުން މާލެ ސިޓީއާއި ހުޅުމާލޭގައި ހަވާ އެރުވުމުގެ ހަރަކާތެއް ބޭއްވުމަށް ހަމަޖެހިފައިނުވާކަމަށެވެ. ނަމަވެސް މިރޭ 40 އަށްވުރެ ގިނަ ރިސޯޓުގައި ކަނޑައެޅޭ ވަކި ގަޑިތަކެއްގައި ހަވާ އެރުވުމަށް ހަމަޖެހިފައިވާކަމަށް އާޒިމް ވިދާޅުވިއެވެ.
ފަހަކަށް އައިސް ކޮންމެ އަހަރަކުވެސް އައު އަހަރަށް މަރުޚަބާ ކިޔުމުގެ ގޮތުންނާއި، ރާއްޖެއަށް ޒިޔާރާތްކުރާ ފަތުރުވެރިންގެ އަދަދު ފާހަގަކުރުމުގެ ގޮތުން މާލޭ ސިޓީގައި އަންނަނީ ކުލަގަދަ ހަރަކާތްތަކެއް ބާއްވަމުންނެވެ. އެގޮތުން ތަފާތު ނަންނަމުގައި މިއުޒިކް ޝޯވތައް މީގެ ކުރިން ބާއްވާފައިވާއިރު، މިފަދަ މިއުޒިކް ޝޯވތަކުގައި ރާއްޖޭގެ ފަންނާނުންގެ އިތުރުން ބޮލީވުޑްގެ ބައެއް މަޝްހޫރު ފަންނާނުންވެސް ބައިވެރިވެފައިވެއެވެ. އަދި މިފަދަ ހަރަކާތްތަކުގައި ހަވައާއި ބަޑިބޭހުގެ ކުޅިވަރުތައްވެސް ވަނީ ކުރިއަށްގެންގޮސްފައެވެ.
ނަމަވެސް އައު އަހަރަށް މަރުޚަބާ ކިޔުމުގެ ގޮތުން މިފަހަރު އެފަދަ އެއްވެސް ހަރަކާތެއް ނުބޭއްވުމަށް ސަރުކާރުން ވަނީ ނިންމާފައެވެ.
ކޮމެންޓްސް (0)