ޓޫބްރަދާސް ފައިނަލާ ގާތަށް

ގަންބުރި ޗެލެންޖް 2018 ގެ ނަމުގައި މިހާރު މީދޫގައި ބާއްވަމުންދާ ފުޓުބޯޅަ މުބާރާތުގައި އިއްޔެ ހަވީރު ކުޅުނު މެޗުން ޝައުގު ބަލިކޮށް ޓޫބްރަދާސް ފައިނަލާ ގާތަށް ދަތުރުކޮށްފިއެވެ. ޓޫބްރަދާސްއަށް ފައިނަލްގެ އުއްމީދު އާވެފައިވަނީ އެޓީމު މިމުބާރާތުގައި ކުޅުނު 3 މެޗުން 7 ޕޮއިންޓް ލިބުމާއި ގުޅިގެންނެވެ.

އިއްޔެ ހަވީރު ކުޅުނު މި މެޗުގައި ޝައުގު ޓީމުގެ ފަރާތުން ދަށް ކުޅުމެއް ފެނިގެންދިޔަ އިރު މި މެޗު ޓޫބްރަދާސް ކާމިޔާބުކުރީ 2 ލަނޑު 0 ލަނޑުންނެވެ.

މިމެޗްގައި ޓޫބްރާސްއިން ކާމިޔާބުކުރި 2 ލަނޑުގެ ތެރެއިން ފުރަތަމަ ލަނޑު ފުރަތަމަ ހާފްގައި މައުޝޫގު ކާމިޔާބުކޮށްދީފައިވާއިރު 2 ވަނަ ލަނޑު ދެވަނަ ހާފްގައި ކާމިޔާބުކޮށްދީފައިވަނީ ރާއީއެވެ.

މިމުބާރާތުގައި ޓޫބްރަދާސް ކުޅުނު 3 މެޗުގެ ތެރެއިން 2 މެޗުން މޮޅުވެ 1 މެޗުން އެއްވަރުވެ 7 ޕޮއިންޓް ލިބިފައިވާއިރު ޝައުގު ކުޅުނު 3 މެޗުގެ ތެރެއިން 2 މެޗުން ބަލިވެ 1 މެޗުން މޮޅުވެ ޝައުގަށް ލިބިފައިވަނީ 3 ޕޮއިންޓެވެ.

މިމުބާރާތުގައި މިއަދު ހަވީރު ކުޅެވޭ މެޗްގައި ބައްދަލުކުރާނީ ޕޮލިސްއާއި ގައުމު އެފްސީއެވެ.