މެންޗެސްޓަރ ޔުނައިޓެޑްގެ ކޯޗް މޮރީނިއޯއާއި މިޑްފިލްޑަރ ޕޯގްބާއާއި ދެމީހުންގެ ތެރެއިން ޓީމުގައި ދެމިހުރެވޭނީ ކޮންމެވެސް އެކަކަށްކަމުގައި އިގިރޭސި މީޑިއާތަކުން ބުނަންފަށައިފިއެވެ.
އިގިރޭސި މީޑިއާތަކުން މިގޮތައް ބުނެފައިވަނީ ޕޮގްބާއާއި މޮރީނިއޯއާއި ދެމެދު މައްސަލަތަކެއް ޖެހިފައިވަނިކޮށެވެ. މޮރީނިއޯއާއި ޕޮގްބާއާއި ދެމެދު މައްސަލަ ޖެހިފައިވަނީ މޮރީނިއޯ ބޭނުންވާ ފެންވަރުގައި ޕޮގްބާއަށް ނުކުޅެވުމުގެ އިތުރަށް މިސީޒަން ފެށުމުގެ ކުރީން ޕޮގްބާ ބާސެލޯނާއަށް ބަދަލުވާން މަސައްކަތް ކުރުމުންނެވެ.
އިގިރޭސި މީޑިއާތަކުން ބުނާގޮތުން ޔުނައިޓެޑުން އަންނަނީ މޮރީނިއޯ ދޫކޮށްލުމަށްފަހު އަންނަ ސީޒަނުގައި އެޓީމުގެ ކޯޗަކަށް ފްރާންސްގެ ޒައިނުއްދީން ޒިދާން ގެނައުމަށް މަސައްކަތް ކުރަމުންނެވެ.
ޒިދާނަކީ ރެއާލް މެޑްރިޑްގެ ކޯޗްކަމުގައި އެޓީމަށް ޖެހިޖެހިގެން 3 ފަހަރު ޗެމްޕިއަންސް ލީގު ކާމިޔާބުކޮށްދީފައިވާ ކާމިޔާބު ކޯޗެކެވެ.
ކޮމެންޓްސް (0)