ރާއްޖޭގެ އެންމެ ދެކުނުން އައްޑޫ ސިޓީއާ 800 އެއްހާ ކިލޯމީޓަރު ދުރަށް ބިންހެލުމެއް އައިސްފިއެވެ.
ރާއްޖޭގެ މޫސުމާ ބެހޭ ގައުމީ އިދާރާ އިން ބުނީ ކާލްސް ބާގް ރިޖަށް ބިންހެލުން އައިސްފައިވަނީ އިއްޔެ ހަވީރު 4:46 ގައި ކަމަށެވެ. މި ބިންހެލުން އައިސްފައިވަނީ ރެކްޓަ މިންގަނޑުން 5.6 މެގްނިޓިއުޑްގެ ބާރުމިނުގައި ކަމަށް ވެސް މެޓް އޮފީހުން ބުންޏެވެ.
އެއިދާރާއިން ބުނީ މި ބިންހެލުން އައި ސަރައްހަދަކީ އައްޑޫ ސިޓީއާ 894 ކިލޯމީޓަރު ދުރު ސަރަހައްދެއް ކަމަށެވެ. އަދި މި ބިންހެލުމުގެ ސަބަބުން ރާއްޖެ އަށް އަސަރެއް ކޮށްފައިނުވާކަމަށް އެއިދާރާއިން ވަނީ ބުނެފައި އެވެ.
އައްޑޫ ސިޓީއާއި މާދުރު ނޫން ސަރަހައްދަކަށް އިއްޔެ ބިންހެެލުމެއް އައިސްފައިވާ އިރު މިދިޔަ މަހުގެ 29 ވަނަ ދުވަހު އައްޑޫ ސިޓީ ހިތަދޫ އާ 921 ކިލޯމީޓަރު ދުރަށް ހަތަރު ބިންހެލުން އައިސްފައިވެއެވެ.
އެގޮތުން އެމެރިކާގެ ޖިއޮލޮޖިކަލް ސާވޭއިން ދައްކާ ގޮތުން ދެ ބިންހެލުން އައީ އައްޑޫ ސިޓީ ހިތަދޫއާ 925 ކިލޯމީޓަރު ކައިރިއަށެވެ. އަދި 926 ކިލޯމީޓަރު ކައިރިއަށް އަނެއް ބިންހެލުން އައިއިރު، އަނެއް ބިންހެލުން އައީ 921 ކިލޯމީޓަރު ކައިރިއަށެވެ މި ބިންހެލުންތައްވެސް އައިސްފައިވަނީ އެވަރެޖްކޮށް 5 މެގްނިޓިއުޑްގެ ބާރުމިނުގައި ކަމަށް އެމެރިކާގެ ޖިއޮލޮޖިކަލް ސާވޭއިން ދައްކައެވެ
ކޮމެންޓްސް (0)