ފުވައްމުލަކުގައި ކުރިއަށްދާ އިންޓަރ ސްކޫލް އެތްލެޓިކްސް މީޓޫގައި އައްޑޫ ހައި ސްކޫލުގެ އައިޝަތު ޝައިމް އަޒީޒް 27 އަހަރުވީ ހައި ޖަމްޕުގެ އަންހެން ގައުމީ ރެކޯޑް މުގުރާލައިފި އެވެ.
19 އަހަރުން ދަށުގެ އަންހެން ހައި ޖަމްޕްގެ ގައުމީ ރެކޯޑް ޝައިމް މުގުރާލީ 1.50 މީޓަރު މަތިން ފުންމައިގެންނެވެ. މީގެކުރިން މިރެކޯޑް އޮންނަނީ 1996 ވަނަ އަހަރު މާލޭގައި އޮތް އިންޓަރ ސްކޫލް މުބާރާތުގައި ވާދަކޮށް ރެކޯޑް ހެދި ރަނާ އަހްމަދު ސޯދިގު އަތުގަ އެވެ.
އޮންލައިން ނޫސް “އަދަދު” އަށް މައުލޫމާތު ދެއްވަމުން ޝައިމްގެ ކޯޗު ޔަސްމާން ސޯލިހު ބުނީ މުބާރާތުގައި ބައިވެރިވިއިރު ވެސް ޝައިމް ރެކޯޑު ހަދާނެކަމުގެ ޔަގީންކަން އޮތްކަމަށާއި އެއީ ޕްރެކްޓިސްގައި ވެސް ޝައިމްގެ ޕާސަނަލް ބެސްޓަށްވުރެ މައްޗަށް އޭނާ ފުންމި ކަމަށެވެ. އަދި ޕާސަނަލް ބެސްޓް އުޅެނީ ރެކޯޑަށްވުރެ ކުޑަ ތަންކޮޅެއް ތިރީގައި ކަމަށްވުމުން ރެކޯޑު ހަދާނެކަމުގެ އިތުބާރު އޮތް ކަމަށެވެ.
ޝައިމް ވަނީ ހައި ޖަމްޕުގެ ރަން މެޑަލްގެ އިތުރުން 22.58 މީޓަރަށް އުކައިގެން ޖެވެލިން އުކުމުން ވެސް އެއްވަނަ ހޯދާފަ އެވެ. .
ކޮމެންޓްސް (0)