ސްޕެނިޝް ލަލީގާގައި ރޭ ބާސެލޯނާ ކުޅުނު މެޗު 4-0 ގެ ނަތީޖާއަކުން ކާމިޔާބުކޮށްފިއެވެ.
ބާސާއިން އަމިއްލަ ދަނޑުގައި ރެއާލް ވަލަޑޮލިޑް އާއި ދެކޮޅަށް ހޯދި މޮޅާއެކު އެޓީމުން ވަނީ ލަލީގާގައި މިހާތަނަށް ކުޅުނު ތިން މެޗުން ހަތް ޕޮއިންޓް ހޯދައިގެން ޕޮއިންޓް ޓޭބަލްގެ ދެވަނައަށް ކުރިއަށް ޖެހިލާފައެވެ.
ބާސާއިން ރޭގެ މެޗު ކުޅެފައި ވަނީ ފުލް ކޮންޓްރޯލްގައެވެ. އެޓީމުން މެޗު ޑޮމިނޭޓްކޮށް ކުޅުނުތަން ފެނުނު އިރު، މެޗުގެ ކުރީކޮޅުގައި ރޮބާޓް ލެވަންޑޯސްކީ ބޮލުން ޖެހި ހަމަލާއެއްގެ އިތުރުން އުސްމާން ޑެމްބޭލޭ އަރިމަތިން އަރައި ޖެހި ބާރު ބޯޅައެއް ގޯލުގެ ދަނޑިއަށް އަމާޒުވެފައިވެއެވެ.
މިމެޗްގައި ބާސާއިން މެޗުގެ ފުރަތަމަ ލަނޑުޖަހާ ލީޑު ނެގީ 24 ވަނަ މިނެޓުގައެވެ. މިލަނޑަކީ އަރިމަތިން ރަފީނިއާ ގޯލް ކުރިމައްޗަށް ހުރަސްކޮށްލަ ދިން ބޯޅައެއް ގޯލްތެރެއަށް ވައްދާލައިގެން ލެވެންޑޯސްކީ ކާމިޔާބުކޮށްދިން ލަނޑެކެވެ.
މިމެޗްގައި ބާސާއިން ކާމިޔާބުކުރި ދެވަނަ ލަނޑު ފުރަތަމަހާފު ނިމުމުގެ ކުރިން ޑެމްބޭލޭގެ ޕާހަކުން ކާމިޔާބުކޮށްދީފައިވަނީ ޕެޑްރީ އެވެ.
ބާސާގެ ތިންވަނަ ލަނޑު ދެވަނަ ހާފުގެ ކުރީކޮޅުގައި ލެވަންޑޯސްކީ ކާމިޔާބުކޮށްދީފައިވާއިރު ބާސާގެ ހަތަރުވަނަ ގޯލު މެޗު ނިމިނިމި އޮއްވައި ޖަހައިދިނީ ސާޖިއޯ ރޮބާޓޯއެވެ.
ކޮމެންޓްސް (0)