ޤުދުސަކީ އިސްރާއީލުގެ ވެރިރަށްކަމަށް އިސްރާއީލުން ނިންމި ނިންމުން ބަލައިގަތުމަށާއި އިސްރާއީލުގައިވާ އެމެރިކާގެ އެމްބަސީ ޤުދުސަށް ބަދަލުކުރުމަށް ރައީސް ޑޮނަލްޑް ޓްރަމްޕް ނިންމެވި ނިންމެވުމުގެ ސަބަބުން އެމެރިކާގެ އެއްވެސް އެހީއެއް ޤަބޫލުނުކުރުމަށް ފަލަސްތީނުގެ މަދަނީ ޖަމްއިއްޔާތަކުން ނިންމައިފިއެވެ.
ފަލަސްތީނުގެ ޗެރިޓީ މުއައްސަސާތަކާއި ޔުނިވަރސިޓީތަކާއި ޖަމިއްޔާ ޖަމާއަތްތަކުން ބުނީ އެމެރިކާގެ އެއްވެސް އެހީއެއް ބޭނުން ނުކުރާނެކަމަށާއި، އެމެރިކާއަކީ ފަލަސްތީނަށް ހެޔޮއެދޭ ޤައުމެއްނޫންކަމަށެވެ. ފަލަސްތީނުގެ މުއައްސަސާތަކާއި ޖަމާއަތްތަކުން ނެރުނު ބަޔާނެއްގައި ބުނެފައިވަނީ ޔޫއެސް އެއިޑްގެ ފަރާތުން ހުށަހެޅި އެހީތަކަކަށް އެޖަމިއްޔާތަކުން ނޫނެކޭ ބުނެފައިވާކަމަށެވެ.
އެމެރިކާ އިސްރާއިލާ ގުޅިގެން ފަލަސްތީނާ ދެކޮޅަށް ހަނގުރާމަކުރާއިރު ފަލަސްތީނުގެ އެއްވެސް ރައްޔިތަކު އެމެރިކާގެ އެހީއަށް މަރުޙަބާ ނުކިޔާނެކަމަށް، ފަލަސްތީނުގެ މަދަނީ ޖަމިއްޔާތައް ތަމްސީލުކުރާ މަސްއޫލުވެރިއެއްކަމަށްވާ މައުމޫން އަލްޖާސިރު ވިދާޅުވިއެވެ. އަނެއްކޮޅުން ފަލަސްތީނުގެ 8 ޔުނިވަރސިޓީއަކުންވަނީ އެމެރިކާ ސަރުކާރުން އިންތިޒާމުކުރާ ބައްދަލުވުމެއްގައި ބައިވެރިވުމަށް ދެކޮޅު ހަދާފައެވެ.
ފަލަސްތީނުގެ މަދަނީ ޖަމްއިއްޔާތަކުގެ މި ފިޔަވަޅުގެ ސަބަބުން އެމެރިކާގެ ނުފޫޒު މެދުއިރުމަތީގައި ކުޑަވެގެންދާނެކަމަށް މުރާސިލުން ބުނެއެވެ.
ކޮމެންޓްސް (0)