ޔޫރޯ ފުޓްބޯޅަ މުބާރާތުގައި މިރޭ ފްރާންސާއި އެއްވަރުވެ ގްރޫޕް އެފްގެ ތިންވަ ޓީމަކަށް ޕޯޗްގަލް ހޮވި އެޓީމުވެސް ގަދަ 16 އަށް ދަތުރުކޮށްފިއެވެ.
ހަންގޭރީގެ ޕުސްކަސް އެރީނާގައި ކުޅުނު މިމެޗު އެއްވަރުވެފައިވަނީ ދެލަނޑު ދެލަނޑުންނެވެ.
މިމެޗުގައި ފުރަތަމަ ލަނޑުޖަހާ ލީޑުނެގީ ޕޯޗުގަލް އިންނެވެ. އެޓީމަށް ލިބުނު ޕެނަލްޓީއަކުން ފުރަތަަމަ ހާފުގެ 30 ވަނަ މިނެޓުގައި މި ލަނޑު ޕޯޗުގަލް އަށް ކާމިޔާބު ކޮށްދިނީ ކެޕްޓަން ކްރިސްޓިއާނޯ ރޮނާލްޑޯ އެވެ.
މެޗުގެ ނަތީޖާ ފްރާންސް އިން ހަމަހަމަ ކުރީ ފުރަތަމަ ހާފުގެ ފުރިހަމަވަގުތު ހަމަވެ އިތުރުވަގުތުގެ ދެވަނަ މިނެޓުގެ ތެރޭގައެވެ. މިއީ ފްރާންސްގެ ކިލިއަން އެމްބާޕޭ އަށް ޕޯޗުގަލްގެ ނެލްސަން ސެމެޑޯ ޕެނަލްޓީ އޭރިއާތެރެއިން ކުރި ފައުލަކާއި ގުޅިގެން ރެފްރީ ދިން ޕެނަލްޓީއަކުން ކަރިމް ބެންޒެމާ ކާމިޔާބުކުރި ލަނޑެކެވެ.
މިމެޗްގެ ފުރަތަމަ ހާފް ނިމިގެން ގޮސްފައިވަނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ.
ދެވަނަ ހާފު ފެށިގެން މެޗްގެ ވަރަށް ކުރީކޮޅު ފްރާންސް އިންވަނީ އިތުރު ލަނޑެއް ޖަހާ މެޗުގައި ފުރަތަމަ ފަހަރަށް ލީޑު ނަގާފައެވެ. ދެވަނަ ހާފްގެ ދެވަނަ މިނެޓުގައި މިލަނޑު އެޓީމަށް ކާމިޔާބު ކޮށްދިނީ ފުރަތަމަ ލަނޑުވެސް ކާމިޔާބުކޮށްދިން ބެންޒެމާ އެވެ.
ޕޯޗުގަލް އިން މެޗުގެ ނަތީޖާ ހަމަހަމަކުރީ މެޗުގެ 60 ވަނަ މިނެޓުގައި ލިބުނު ޕެނަލްޓީ އަކުންނެވެ. މިއީ ރޮނާލްޑޯ ނަގައިދިން ހުރަހެއް އޭރިއާ ތެރޭގައި ހުރި ފްރާންސްގެ ކޫންޑޭގެ އަތުގައި ޖެހުމުން ރެފްރީ ދެއްވި ޕެނަލްޓީއެކެވެ
މިމެޗް ނިމިގެން ދިޔައީ އިތުރު ލަނޑެއް ދެޓީމުންކުރެ ޓީމަކަށް ކާމިޔާބު ނުކުރެވި ދެލަނޑު ދެނލަޑުން ދެޓީމް އެއްވަރުވެގެންނެވެ.
މިނަތީޖާ އާއިއެކު ގްރޫޕް އެފްގެ އެއްވަނަ ޓީމުގެ ގޮތުގައި ދެވަނަ ބުރަށް ދަތުރުކުރާނީ ފްރާންސް އެވެ. އެއީ ތިންމެޗުން 5 ޕޮއިންޓް ލިބިގެންނެވެ. މި ގްރޫޕްގެ ދެވަނަ ޓީމެއްގެ ގޮތުގައި ޖަރުމަނުން ދެވަނަ ބުރުން ޖާގަލިބުނީ އެޓީމަށް ތިން މެޗުން ލިބުނު 4 ޕޮއިންޓާއެކުގައެވެ. ތިންވަނަ ޓީމުގެ ގޮތުގައި ދެވަނަ ބުރަށް ހޮވުނު އެންމެފަހުގެ ޗެމްޕިއަން ޕޯޗުގަލް އަށްވެސް ލިބެނީ 4 ޕޮއިންޓެވެ. ޕޯޗުގަލްގެ މައްޗަށް ޖަރުމަނަށް ކުރި ލިބެނީ ހެޑް-ޓު-ހެޑް ނަތީޖާއިންނެވެ.
ކޮމެންޓްސް (0)