އައްޑޫ ސިޓީގައި އިންޑިއާގެ ކޮންސިއުލޭޓެއް ޤާއިމުކުރުމުން ވިޔަފާރީގެ ގޮތުން ކުރިއެރުން ލިބިގެންދާނެކަމަށް އައްޑޫ ސިޓީ ހިތަދޫ އުތުރުދާއިރާގެ މެންބަރު މުޙައްމަދު އަސްލަމް ވިދާޅުވެއްޖެއެވެ.
އައްޑޫ ސިޓީގައި އިންޑިއާގެ ކޮންސިއުލޭޓެއް ޤާއިމުކުރުމަށް އެ ޤައުމުން ނިންމައިފައިވާއިރު, އެކަން ކުރަން ގޮވައިލައްވައި އަސްލަމް ކުރެއްވި ޓްވީޓެއްގައި ވިދާޅުވީ އެކަން ކުރެވިއްޖެނަމަ އައްޑޫއާއި އިންޑިއާއާއި ދެމެދުގައި ވިޔަފާރީގެ ގާތް ގުޅުމެއް އުފެދިގެންދާނެ ކަމަށެވެ. އަދި އެ ގުޅުން ވަރުގަދަވެ އިންޑިއާގެ އިންވެސްޓުމަންޓުތައް އައްޑުއަށް ލިބި, ވިސާގެ ފަސޭހަތަކެއް ވެސް އައްޑޫ ރައްޔިތުންނަށް ލިބޭނެކަމަށެވެ.
ބޭރު ޤައުމެއްގެ ކޮންސިއުލޭޓެއް އައްޑޫގައި ހެދުމަކީ އުފާކުރަންޖެހޭ ކަމެއްކަމަށް އައްޑޫ ސިޓީ ފޭދޫ ދާއިރާގެ މެންބަރުކަން ކުރެއްވި އަލްހާން ފަހުމީ ވެސް ވަނީ ވިދާޅުވެފައެވެ.
އިންޑިއާގެ ކޮންސިއުލޭޓެއް ޤާއިމުކުރުމަށް އެ ޤައުމުން ނިންމައިފައިވާއިރު, ދިވެހި ސަރުކާރަކުން އެކަމަށް އަދި ހުއްދަދީފައިނުވާ ކަމަށް ރައީސް ވަނީ ވިދާޅުވެފައެވެ.
ކޮމެންޓްސް (0)