ރައްޔިތުންގެ މަޖިލީހުގެ ރައީސް، މުޙައްމަދު ނަޝީދަށް އަމާޒުކޮށް ދިން ބޮމުގެ ހަމަލާއިން ލިބިވަޑައިގަތް ޒަޚަމްތަކަށް އިތުރު ފަރުވާ ހޯއްދެވުމަށް ޖަރުމަންވިލާތަށް ފުރައިވަޑައިގެންފިއެވެ. އެމަނިކުފާނު ޖަރުމަންވިލާތަށް ފުރާވަޑައިގަތީ، ޕްރައިވެޓް ޖެޓެއްގައެވެ.
ރައީސް ނަޝީދު އޭޑީކޭ ހޮސްޕިޓަލުން ވެލާނާ އިންޓަރނޭޝަނަލް އެއަރޕޯޓަށް ވަޑައިގަތީ ވަރަށް ވަރުގަދަ ސެކިއުރިޓީއަކާއެކުއެވެ. އެގޮތުން އެމަނިކުފާނު ފުރާވަޑައިގަތުމުގެ މާކުރިން އޭޑީކޭ ހޮސްޕިޓަލުން ފެށިގެން މާލޭގެ ބައެއް މަގުތަކާއި ބްރިޖާއި، އެއަރޕޯޓް ސަރަހައްދުގައި ސަލާމަތީ ޚިދުމަތްތަކުން ގެންދިޔައީ ފޯރިމަރަމުންނެވެ. އެގޮތުން ސެކިއުރިޓީ އުޅަނދުތަކާއި، ހަތިޔާރާއެކު ގިނަ އަދަދެއްގެ ސިފައިންނާއި ފުލުހުން ހަރަކާތްތެރިވިއެވެ.
މިއީ ފަހަކަށް އައިސް މިހާ ވަރުގަދަ ސެކިއުރޓީއެއް ރާއްޖޭގެ އިސް ބޭފުޅަކަށް ހަމަޖައްސައިދެއްވި ފުރަތަމަ ފަހަރެވެ. ރައީސް ނަޝީދަށް އަމާޒުކޮށް ދިން ހަމަލާއަށްފަހު ފުރަތަމަފަހަރަށް ރޭ ކުރެއްވި ޓްވީޓެއްގައި ރައީސް ނަޝީދު ވަނީ ސިއްޙީ ދާއރާއަށާއި، ސިއްޙީ ޚިދުމަތްތެރިނަށް ޝުކުރު އަދާކުރައްވާފައެވެ.
ރައީސް ނަޝީދުގެ ހާލަުކޮޅު މިހާރު ރަނގަޅުވަމުން އަންނައިރު، ހަމަލާއާއި ގުޅިގެން އެމަނިކުފާނު ހޮސްޕިޓަލަށް ގެންދެވުނިއިރު ހާލަުކޮޅު ވަރަށް ސީރިއަސްކަމަށާއި، އެމަނިކުފާނުގެ ފުރާނަ ސަލާމަތްވީ ކިރިޔާކަމަށް، ރައީސް ނަޝީދަސް ފަރުވާދެއްވި ޑޮކްޓަރުންގެ ޓީމުން ވިދާޅުވެފައިވެއެވެ.
ޑޮކްޓަރުންގެ ޓީމުން ހާމަކޮށްފައިވާގޮތުން ގޮއްވާލެވުނު އެތިން ބުރައިގެންދިޔަ ތޫނު ދަގަނޑު އެތިކޮޅުތަކުގެ ތެރެއިން އެތިކޮޅެއް، އެމަނިކުފާނުގެ ސީދާ ހިތަށް ނުވަދެ ހުރީ އެންމެ ސެންޓިމީޓަރެއްގެ ދުރުމިންކަމަށެވެ. މި އެތިކޮޅު ރައީސް ނަޝީދުގެ ހިތަށް ނުވަދެ ސަލާމަތްވީ އެމަނިކުފާނުގެ މޭކަށިގަނޑުގައި ޖެހި ކަށިގަނޑު ފުނޑުފުނޑުވުމުގެ ސަބަބުން އެ އެތިކޮޅު އެތެރެއަށް ދިޔުން މަތަވެގެންކަމަށްވެސް ޑޮކްޓަރުން ވަނީ ވިދާޅުވެފައެވެ.
އެމަނިކުފާނަށް އަމާޒުކޮށް ދެވުނު ހަމާލާއަށްފަހު ފުރަތަމަ ފަހަރަށް ރައީސް ނަޝީދު ކުރެއްވި ޓްވީޓުގައިވަނީ ޞިއްހީ ޚިދުމަތްތެރިންނަށް ޝުކުރު އަދާކުރައްވައިފިއެވެ.
ރައީސް ނަޝީދަށްް ހަމަލާދިން މައްސަލާގައި މިހާތަނަށް 3 މީހަކު ވަނީ ހައްޔަރުކޮށްފައެވެ.
ކޮމެންޓްސް (0)