އެމްއީސީ ބަދަހިކަޕް – ގްރޫޕީން ސެމީފައިނަލަށް ހޮވުނީ މިފްކޯއާއި ޕޮލިސް

މިހާރު މީދޫގައި ހިގަމުންދާ ” އެމް.އީ.ސީ ބަދަހިކަޕް ” ނެޓްބޯޅަ މުބާރާތުގެ ގްރޫޕީން ސެމީފައިނަލަށް ދެޓީމް ދަތުރުކޮށްފި އެވެ.

ގްރޫޕް ބީން އެއްވަނަ ޓީމެއްގެ ގޮތުގައި ކުޅުނު 3 މެޗުން މޮޅު 9 ޕޮއިންޓް ހޯދައިގެން ހުޅުމީދޫ ޕޮލިސް ރިކްރިއޭޝަން ކްލަބް ސެމީފައިނަލަށް ހޮވިފައިވާއިރު ގްރޫޕް ބީގެ ދެވަނަ ޓީމެއްގެ ގޮތުގައި ސެމީފައިނަލަށް ހޮވިފައިވަނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ ) އިން އޭއެފްސީ ނެޓްބޯޅަ ޓީމްގެ ނަމުގައި މުބާރާތުގައި ބައިވެރިވި ޓީމެވެ. އޭފްސީ ނެޓްބޯޅަ ޓީމް ސެމީފައިނަލަށް ހޮވުނީ އެޓީމު ކުޅުނު 3 މެޗްގެ ތެރެއިން އެއްމެޗުން މޮޅުވެ އެއްމެޗުން އެއްވަރުވެ އަދި އެއްމެޗުން ބަލިވެ ލިބުނު 4 ޕޮއިންޓާއެކުގައެވެ.

އޭއެފްސީ ނެޓްބޯޅަ ޓީމާއި މިގްރޫޕްގައި ހިމެނޭ އެމްޕީއެލްގެ ޓީމް ޕޮއިންޓްގެ ގޮތުން އެއްވަރުވިކަމުގައިވިޔަސް އެމްޕީއެލްޓީމް ސެމީފައިނަލަށް ނުހޮވި މުބާރާތުން ކަޓައިގެންދިޔައީ އޭ.އެފް.ސީ  ( މިފްކޯ ) ނެޓްބޯލް ޓީމަށްވުރެ  އެޓީމަށް ސްކޯ ކުރެވުނު  ޕޮޓް ގެ އަދަދު މަދުވެގެންނެވެ. އެމްޕީއެލްގެ ޓީމަށް 68 ޕޮޓް ކާމިޔާބުކުރެވިފައިވާއިރު އޭ.އެފް.ސީ ( މިފްކޯ )  ނެޓްބޯލް ޓީމަށް ކާމިޔާބުކުރެވިފައިވަނީ 76 ޕޮޓެވެ. އެހެންކަމުން އެމްޕީއެލް ޓީމުގެ މައްޗަށް އޭ.އެފް.ސީ ( މިފްކޯ )  ނެޓްބޯލް ޓީމަށް ކުރިލި އެޓީމް ސެމީފައިނަލަށް ހޮވުނީ 8 ޕޮޓްގެ ތަފާތުންނެވެ.