މިނިވަންކަޕް ފުޓްސަލް މުބާރާތް 2019 ގެ ފައިނަލުން ރެސޯޓްބޯއިސްއާއި ތައްލި ޖާގަހޯދައިފިއެވެ.
ރެސޯޓްބޯއިސް ފައިނަލުން ޖާގަހޯދާފައިވަނީ މިރޭ ކުޅެވުނު މިމުބާރާތުގެ ސެމީފައިނަލްގެ ފުރަތަމަމެޗްގައި ހިތަދޫ މަލްޓިޖީނިއަސްއާއި ބައްދަކުކޮށް 6 ލަނޑު 4 ލަނޑުން މޮޅުވެގެންނެވެ.
މިމެޗްގައި ރެސޯޓްގެ ހުސެން އީމާން 3 ލަނޑު ޖަހާ ހެޓްރިކް ހަދާފައިވެއެވެ. ރެސޯޓްބޯއިސްގެ އަނެއް 3 ލަނޑުގެ ތެރެއިން ދެލަނޑު އަލީ ހާފިޒު ކާމިޔާބުކޮށްދީފައިވާއިރު އެޓީމުގެ އަނެއްލަނޑު ކާމިޔާބުކޮށްދިނީ އިބްރާހިމް އަސްވާދެވެ. މަލްޓީޖީނިއަސްއިން މިމެޗްގައި ކާމިޔާބުކުރި 4 ލަނޑު ކާމިޔާބުކޮށްދީފައިވަނީ އީމާން ނަޒީރު ، ހަސަން ލައުހު ، އަލީ ފަހުމީ އަދި އަނީލް އިބްރާހިމްއެވެ.
މިމެޗްގެ މޮޅުކުޅުންތެރިއަކަށް ހޮވިފައިވަނީ ރެސޯޓްބޯއިސްގެ ހުސެން އީމާނެވެ.
މިރޭ ކުޅެވުނު ސެމީފައިނަލުގެ ދެވަނަމެޗުގައި ގައުމު އެފްސީއާއި ބައްދަލުކޮށް 8 ލަނޑު 0 ލަނޑުގެ ބޮޑުތަފާތަކުން މޮޅުވެ މިމުބާރާތުގެ ފައިނަލުގެ ދެވަނަ ޖާގަ ހޯދީ މިދިޔައަހަރުވެސް މިމުބާރާތުގެ ޗެމްޕިއަންކަންހޯދާފައިވާ ތައްލިހިއެވެ.
މިމެޗްގައި ތައްލިހިޓީމްގެ އަލީޝިފާއު 3 ލަނޑުޖަހާ ހެޓްރިކް ހަދާފައިވާއިރު އެޓީމުގެ މުހައްމަދު ލިޔާހު 2 ލަނޑު ކާމިޔާބުކޮށްދީފައިވެއެވެ. ދެން އެޓީމުން ކާމިޔާބުކުރި 3 ލަނޑު ކާމިޔާބުކޮށްދިނީ ޝަމްހާދު ސައީދުއާއި އަލީ ލިރުއާމް އަދި އަބްދުﷲ އިމްރާނެވެ.
މިމެޗްގެ މޮޅުކުޅުންތެރިއަކަށް ހޮވިފައިވަނީ ތައްލިހިޓީމްގެ އަލީޝިފާއުއެވެ.
ތައްލިއާއި ރެސޯޓްބޯއިސް ބައްދަލުކުރާ މިމުބާރާތުގެ ފައިނަލްމެޗްގެ ކުޅުން އޮންނާނީ މިމަހުގެ ތޭރަ ވަނަދުވަހުގެރޭ 21:00 ގައެވެ.
ކޮމެންޓްސް (0)