ރޭގެ ވަގުތެއްގައި ޕީޕީއެމް ދޫކޮށްލެއްވިކަން އުއުލާނުކުރެއްވި ރައީސް ޔާމީނު އަލަށް އުފެއްދުމަށް ތައްޔާރުވަމުންދާ ސިޔާސީ ޕާޓީއަށް ކިޔާނެ ނަން ފައިނަލްކޮށްފިއެވެ.
ރައީސް ޔާމީން އުފެއްދުމަށް ތައްޔާރުވަމުންދާ ޕާޓީގެ މަސައްކަތްތައް މިހާރު ކުރިއަށްދާގޮތާއި ބެހޭގޮތުން މިނިވަންއާ ވާހަކަދައްކަމުން ރައީސް ޔާމީނުގެ ފަޅިން އެކަމުގައި އެންމެ އިސްކޮށް މަސައްކަތްކުރައްވާ މުހައްމަދު މަލީހް ވިދާޅުވީ އައު ޕާޓީ އުފެއްދުމަށްޓަކައި ވާންޖެހޭ ތައްޔާރީތައް ވަމުން އަންނަ ކަމަށެވެ.
މިގޮތުން ރޭ ކުރެވުނު މަސައްކަތްތަކުން ޕާޓީއަށް ކިޔާނެ ނަމެއް ފައިނަލްކޮށް، ޕާޓީހެދުމަށް ތައްޔާރުކުރަންޖެހޭ ލިޔެކިޔުންތައް ފުރިހަމަ ކުރުމުގެ މަސައްކަތް ކުރައްވަމުން އަންނަ ކަމަށް މަލީހް ވިދާޅުވިއެވެ.
“ޕާޓީއަށް ކިޔާނެ ނަން އިއުލާނުކޮށްދެއްވާނީ ރައީސް ޔާމީނު. ލޯގޯ ހެދުމާއި އެނޫންވެސް ކަންކަން ވަރަށް ބާރު ސްޕީޑެއްގައި ކުރިއަށް އެބަދޭ”
މަލީހް ވިދާޅުވިއެވެ.
ރައީސް ޑރ.މުއިއްޒު ވެރިކަމުގެ ހުވާ ކުރެއްވިތާ މިއަދަށް ހަފްތާއެއް ފުރިހަމަ ވާއިރު، އެމަނުކުފާނާއި، ރައީސް ޔާމިނާ ދެމެދު އޮތް ގުޅުން ވަނީ ވަރަށްބޮޑަށް ގޯސްވެފައެވެ. ރައީސް ޔާމީނު ފަޅިން ބުނާގޮތުގައި އެމަނިކުފާނުގެ ފޮޓޯ ދައްކައިގެން ވެރިކަމަށް ވަޑައިގެންނެވި ރައީސް ޑރ.މުއިއްޒު ވެރިކަމުގެ ހުވާކުރެއްވުމާއި ހިސާބުން ވަނީ ރައީސް ޔާމީނު ބާކީ ކުރައްވާފައެވެ.
މިކަމާއި ގުޅޭގޮތުން ރައީސް ޔާމީނު ފަޅީގައި ހުންނެވި މަލީހު ރޭ ވަނީ އެކްސްގައި ޑޜ.މުއިއްޒަށް ސުވާލުތަކެއް ކުރިމަތިކުރުވާފައެވެ.
މަލީހް ވިދާޅުވީ، އެބޭފުޅުން މިހާރު އެކުރައްވަމުން ގެންދަވާ މަސައްކަތުގައި ފަހަތަށް ޖެހިވަޑައިނުގެން ސާބިތުކަމާއެކު ހުންނަވާނޭ ކަމަށާއި، ވެރިކަމުގެ ހުވާކުރެއްވުމާއި ހަމަޔަށް ޑރ.މުއިއްޒު ކައިރީ ބެހެއްޓެވި ހުސްގޮނޑިއަށް ވީގޮތް ހޯއްދަވާނޭ ކަމަށެވެ.
ޕީޕީއެމަށް ނާންގައި ނޫސްވެރިންގެ ބައްދަލުވުމެއް ބޭއްވި މައްސަލައިގައި ޕީޕީއެމްގެ ސްލޫކީ ކޮމިޓީން ރޭގެ ވަގުތެއްގައި މަލީހް ވަކިކޮށްފައިވާއިރު، ޕާޓީން ވަކިކުރި މައްސަލަ ބަލައި ނުގަންނާނޭކަމަށް މަލީހް ވަނީ ވިދާޅުވެފައެވެ.
މަލީހް ވިދާޅުވެފައިވަނީ އޭނާ ވަކިކުރި މައްސަލަ ޕީޕީއެމްގެ ސްލޫކީ ކޮމިޓީން ބަލާފައިވަނީ އުސޫލްތަކާއި ހިލާފަށް ކަމަށެވެ. ލީކުވެގެން އުޅޭ ސިޓީއަކީ ޕީޕީއެމްގެ ކުރީގެ އެސްޖީ ތޮލާލު މަޤާމުން ވަކިވި ފަހުން ޕާޓީގެ ލެޓާރހެޑްގެ ނަާޖާއިޒު ބޭނުންހިފާ ސްޓޭމްޕު ނުކޮށް އާންމުކޮށްފައިވާ ފޭކު ސިޓީއެއް ކަމަށްވެސް މަލީހް ވަނީ ވިދާޅުވެފައެވެ.
ކޮމެންޓްސް (0)