ތޫފާނެއްގެ އިންޒާރާއެކު ސައުތުކޮރެއާގައި މިހާރު ކުރިއަށްދާ ދިވެހި ސްކައުޓުން ބައިވެރިވާ ވޯލްޑް ސްކައުޓް ޖަމްބަރީގެ ކޭމްޕް ސައިޓް ހުސްކުރަން ފަށައިފި އެވެ.
ސައުތު ކޮރެއާގެ މޫސުމާބެހޭ އިދާރާއިން، ތޫފާން “ޚާނޫން”ގެ ސީދާ އަސަރު ޖަމްބަރީގެ ކޭމްޕް ސައިޓަށް ކުރާނެ ލަފާކުރެވޭތީ ޖަމްބަރީ އޯގަނައިޒް ކުރާ ފަރާތުން ވަނީ ޖަމްބަރީގެ ބައިވެރިން ރައްކާތެރި ސަރަހައްދަކަށް ބަދަލުކުރުމުގެ މަސައްކަތް މާދަމާ ފަށާނެއެވެ.
“ގާފު” ނޫހަށް މައުލޫމާތުލިބިފައިވާގޮތުގައި ޖަމްބަރީގައި ބައިވެރިވާ ހުރިހާ ދިވެހި ސްކައުޓުންގެ ހާލުވެސް ރަނގަޅެވެ. އަދި ރައްކާތެރި ސަރަަހައްދަކަށް ބަދަލުވުމަށްޓަކައި އެންމެންވެސް ތިބީ ތައްޔާރުވެގެންނެވެ.
ސްކައުޓުން ރައްކާތެރި ސަރަހައްދަކަށް ބަދަލުކުރުމުގެ އަމަލީ މަސައްކަތް އަންގާރަ ދުވަހު ހެނދުނު ފެށުމަށް ހަމަޖެހިފައިވާއިރު، އެމަސައްކަތް އެއްކޮށް ނިންމާލުމަށް ޖުމްލަ 6 ގަޑިއިރު ނަގާނެ ކަމަށް ކަމާބެހޭފަރާތްތަކުން ވަނީ ބުނެފައެވެ.
ސައުތުކޮރެއާގައި މިހާރު ކުރިއަށްދާ ވޯލްޑް ސްކައުޓް ޖަމްބަރީ ހިނގަމުންދާ ސަރަހައްދުގެ ފިނިހޫނުމިން މައްޗަށް ދިޔުމުގެ ސަބަބުން ބައެއް ގައުމުތަކުން ވަނީ ޖަމްބަރީން ވަކިވެފައެވެ.
ކޮމެންޓްސް (0)