އިންޑިޔާގެ އުތުރުގެ ސަރަޙައްދުތަކުގައި އާދަޔާ ޚިލާފަށް ހޫނު ގަދަވެ މަރުވި މީހުންގެ ޢަދަދު 34 އަށް އަރައިފިއެވެ. ހޫނުގެ އަސަރު އެންމެ ބޮޑަށް ކުރަމުން ދަނީ އުއްތަރް ޕްރަދޭޝް ސްޓޭޓަށެވެ. 34 މީހުން މަރުވެފައި ވަނީ ހުސްވި ދެ ދުވަހުގެ ތެރޭގައި ކަމަށް އެ ސްޓޭޓްގެ އޮފިޝަލުން ވިދާޅުވެއެވެ.
އާދަޔާ ޚިލާފަށް ހޫނު ގަދަވުމާ ގުޅިގެން އުމުރުން ދުވަސްވީ މީހުން ގެއިން ބޭރަށް ނިކުތުމަކީ ރައްކާތެރި ކަމެއް ނޫން ކަމަށް ކަނޑައަޅައި، ޑޮކްޓަރުން ވަނީ އިރުޝާދުދީފައެވެ. މިހާތަނަށް މަރުވެފައިވާ މީހުންގެ ތެރޭގައި ގިނައީ 60 އަހަރުން މަތީގެ މީހުންނެވެ. އަދި، އެކި ބަލިތައް ތަހައްމަލު ކުރަމުންދާ މީހުންނެވެ.
ގިނަ މީހުން މަރުވީ ލަކްނޯގެ އިރުދެކުނުން އޮންނަ ބާލިޔާ ޑިސްޓްރިކްޓުން ކަމުގައި އެ ރަށުގެ ޗީފް މެޑިކަލް އޮފިސަރ ޖަޔަންތް ކުމާރު ވިދާޅުވިއެވެ. “މަރުވެފައިވާ ގިނަ މީހުންނަކީ ޞިއްޙީ އެކި މައްސަލަތަކަށް ފަރުވާ ކުރަމުން ދިޔަ މީހުން. ހޫނު ގަދަވުމުގެ ސަބަބުން އެ މީހުންގެ ހާލަތު ގޯސްވި،” ކުމާރު ވިދާޅުވިއެވެ. ގިނަ މީހުން މަރުވީ ހާޓް އެޓޭކް، ސްޓްރޯކް އަދި ބޭރަށް ހިންގުމާ ގުޅިގެންނެވެ.
މީގެ އިތުރުން ވެސް ގިނަ ޢަދަދެއްގެ ބަޔަކު ހޮސްޕިޓަލުތަކުގައި އެޑްމިޓުކޮށްގެން ފަރުވާދެމުންދާ ކަމުގައި އެ ރަށުގެ އެހެން މެޑިކަލް އޮފިސަރެއް ކަމުގައިވާ ދިވާކަރް ސިންހް ވިދާޅުވިއެވެ. ބާލިޔާ ޑިސްޓްރިކްޓުގެ ފިނިހޫނުމިން ރެކޯޑު މިންވަރަކަށް ވަނީ އުފުލިފައެވެ. އިންޑިޔާގެ މޫސުމާ ބެހޭ އިދާރާއިން ބުނީ އެ ސަރަޙައްދުގެ ފިނިހޫނުމިން 42.2 ޑިގްރީ ސެލްސިއެސްއަށް އުފުލިފައިވާ ކަމުގައެވެ.
އާދަޔާ ޚިލާފަށް ހޫނު ގަދަވުމުގެ ސަބަބުން ކަރަންޓު ބޭނުންކުރާ މިންވަރު އިތުރުވެ، ކަރަންޓުގެ ޚިދުމަތްދޭން ބޭނުންކުރާ ވަސީލަތްތަކުގެ ލޯޑު ބޮޑުވެފައިވާއިރު، ބައެއް ސަރަޙައްދުތަކުން ވަނީ ކަރަންޓުގެ ޚިދުމަތް ވެސް މެދުކެނޑިފައެވެ. އަދި ފެނުގެ ޚިދުމަތް ވެސް ވަނީ ކެނޑިފައެވެ. މި ކަމާ މެދު ހިތްހަމަނުޖެހުން ފާޅު ކުރުމަށް ގިނަ ޢަދަދެއްގެ ބަޔަކު ވަނީ މުޒާހަރާ ވެސް ކޮށްފައެވެ.
މި ކަމާ ގުޅޭ ގޮތުން އުއްތަރް ޕްރަދޭޝްގެ ޗީފް މިނިސްޓަރ ޔޯގީ އަދިތްޔާނަތް ވިދާޅުވީ ކަރަންޓާއި ފެނުގެ ޚިދުމަތް މެދުކެނޑިފައިވާ ސަރަޙައްދުތަކަށް އެ ޚިދުމަތްތައް އަލުން ގުޅައިދިނުމަށް ސަރުކާރުން މަސައްކަތް ކުރަމުންދާ ކަމުގައެވެ. އަދި، މި ކަމުގައި ސަރުކާރަށް އެއްބާރުލުން ދިނުމަށް އޭނާ ވަނީ އެ ސްޓޭޓްގެ ރައްޔިތުންގެ ކިބައިން އެދިވަޑައިގަންނަވާފައެވެ.
ކޮންމެ އަހަރެއްގެ އޭޕްރިލް މަހުން ފެށިގެން ޖޫން މަހާ ދެމެދު އިންޑިޔާގެ ސަރަޙައްދުތަކަށް ކުރިމަތިވާ ހޫނު މޫސުމުގައި އާދަޔާ ޚިލާފަށް ހޫނު ގަދަވެ، މީގެ ކުރިން ވެސް ގިނަ ޢަދަދެއްގެ މީހުންގެ ފުރާނަ ގެއްލިފައިވެއެވެ. އަދި، ފަހަކަށް އައިސް ހޫނު ގަދަވާ މިންވަރު އިތުރުވެފައިވާ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ހޫނު މޫސުމުގައި 1.4 ބިލިޔަން މީހުންގެ އާބާދީއެއް އޮންނަ އިންޑިޔާގެ ބައެއް ސަރަޙައްދުތަކުގައި ފެނުގެ ދަތިކަން ކުރިމަތިވާ ކަން ވެސް ފާހަގަކުރެވެއެވެ. އޭޕްރިލް މަހުގެ ތެރޭގައި އިންޑިޔާގެ ވިޔަފާރީގެ މަރުކަޒީ ރަށް މުމްބާއީގައި އާދަޔާ ޚިލާފަށް ހޫނު ގަދަވެ 13 މީހުން ވަނީ މަރުވެފައެވެ.
މަސްދަރު : ޕީއެސްއެމް ނިއުސް
ކޮމެންޓްސް (0)