މީދޫ ގެ ޒުވާނުން އިސްނަގައިގެން މީދޫ ޔޫތްޗެލެންޖް 2020 ގެ ނަމުގައި ބާއްވާ ފުޓްބޯޅަ މުބާރާތެއް މާދަމާ ( 17 ޖުލައި 2020 ވަނަ ދުވަހު ) ފެށުމަށް ހަމަޖެހިފައިވާކަމަށް މައުލޫމާތު ލިބިއްޖެވެ.
މިމުބާރާތް އިންތިޒާމް ކުރާ ފަރާތްތަކާއި ހަވާލާދީ ” އޭއޯނިއުސް” ގެނެސްދީފައިވާ ޚަބަރެއްގައި ބުނެފައިވަނީ މިމުބާރާތް ބޭއްވުމުގެ ބޭނުމަކީ މީދޫގެ ޒުވާނުންގެ މެދުގައި ފުޓުބޯޅަ ކުރި އެރުވުމާއި ޒުވާނުންގެ މެދުގައި އެކުވެރިކަން ބަދަހިކުރުންކަމުގައެވެ.
މިމުބާރާތުގައި ބައިވެރިވެފައިވަނީ މީދޫގެ 7 ޓީމެކެވެ. މި 7 ޓީމް ދެގުރޫޕަކަށް ބަހާލައިގެން ކުރިއަށް ގެންދާ މިމުބާރާތުގެ ގްރޫޕް އޭގައި ހިމެނެނީ 3 ޓީމެވެ. އަދި ގްރޫޕް ބީގައި ހިމެނެނީ 4 ޓީމެވެ.
ގްރޫޕް އޭގެ ޓީމްތައް
އެފްސީ ބަސްޕާކް
ބްލެކް ހައުކްސް
ކްލަސްޓާ އެފްސީ
ގްރޫޕް ބީ ގެ ޓީމްތައް
އެތުލެޓިކް އެފްސީ
އެފްސީ އަމީގޯސް
ސީނުމީދޫ ވެޓްރެންސް
އެފްސީ ކީރިތި
މިމުބާރާތުގެ ގްރޫޕްމެޗްތަކުގައި ކޮންމެ ގްރޫޕެއްގައި ހިމެނޭ ޓީމެއް ކޮންމެ ޓީމަކާ އެއްފަހަރު ބައްދަލުކޮށް ޕޮއިންޓްގެ ގޮތުން އެންމެ މޮޅުވާ ދެޓީމް ކޮންމެ ގްރޫޕަކުންވެސް ސެމީފައިނަލަށް ހޮވޭގޮތައް ވަނީ ހަމަޖައްސާފައެވެ.
މިމުބާރާތް އިންތިޒާމް ކުރާ ފަރާތުން މި މުބާރާތުގެ ޗެމްޕިއަންޓީމަށް ވާދައިގެ ތަށްޓާ އެކު ސެޓްފިކެޓް ދިނުމަށް ނިންމާފައިވާއިރު މުބާރާތުގެ އެންމެ މޮޅު ހަތް ކުޅުންތެރިންގެ އިތުރުން އެންމެ ގިނަ ގޯލް ޖަހާ ކުޅުންތެރިޔާއާއާއި ރަނައަޕްޓީމްގެ މަގާމްވެސް ހޮވުމަށް ހަމަޖެހިފައިވާކަމަށް މިމުބާރާތާބެހޭގޮތުން “އޭއޯނިއުސް” ގައި ގެނެސްދީފައިވާ ޚަބަރުގައި ހާމަކޮށްފައިވެއެވެ.
މާދަމާ ހަވީރު 4:30 ގައި މީދޫ ފުޓްބޯޅަ ދަނޑުގައި ފަށާ މިމުބާރާތުގެ ފުރަތަމަ މެޗްގައި ބައްދަލުކުރުމަށް ހަމަޖެހިފައިވަނީ ގްރޫޕް އޭގައި ހިމެނޭ ކްލަސްޓާ އެފްސީއާއި ބްލެކް ހައުކްސް އެވެ.
ކޮމެންޓްސް (0)