ކައުންސިލްތަކަށް ލިބޭ މަދު އާމްދަނީން ވެސް ހއ.އަތޮޅުގައި ކުޅިވަރު ކުރިއަރުވަން އެ އަތޮޅުގެ ކައުންސިލް ތަކުން ކުރާ މަސައްކަތް ފާހަގަކޮށް ބާރަށު ދާއިރާގެ ޕީއެންސީގެ މެމްބަރު އިބްރާހިމް ޝުޖާއު ވިދާޅުވެއްޖެއެވެ.
ޕީއެންސީގެ ނައިބު ރައީސްކަން ވެސް ކުރަށްވަމުން ގެންދަވާ ޝުޖާއު މިހެން ވިދާޅުވީ، ސަރުކާރުގެ ފަރާތުން، ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު (ލަތީބެ) މަޖިލީހަށް ހުށަހަޅުއްވާފައިވާ ދިވެހިރާއްޖޭގެ ކުޅިވަރު ޤާނޫނުށް އިޞްލާޙު ގެނައުމުގެ ބިލަށް ބަހުސް ކުރަށްވަމުންނެވެ.
މި ބިލުގެ ބަހުސްގައި ސުޖާޢު ވިދާޅުވީ، ދިވެހިރާއްޖޭގެ ކުޅިވަރު
ކުރިއަރުވާ އެންމެ ބޮޑަށް މަސައްކަތްކުރާ އެއް ފަރާތަކީ ރަށްރަށުގައި އުފެދިފައިވާ ކައުންސިލުތައްކަމަށެވެ.
ވަކިން ޚާއްޞަކޮށް ދިވެހި ފުޓުބޯޅަ އާއި ވޮލީ ފަދަ ކުޅިވަރުގެ އެކިއެކި މުބާރާތްތައް ރާވައި ހިންގަނީ މިހާރު މާލޭގައި
ހުންނަ އެސޯސިއޭޝަންތަކަށްވުރެ ރަށްރަށުގެ ކައުންސިލުތަކުން ކަމަށް ޝުޖާއު ވިދާޅުވިއެވެ.
ވަކިން ޚާއްޞަކޮށް އަޅުގަނޑު ފާހަގަކޮށްލަން ބޭނުންވޭ މި ފުރުޞަތުގައި ކައުންސިލުތަކަށް ޝުކުރު އަދާކުރާއިރު އަޅުގަނޑު ނިސްބަތްވާ ހއ.އަތޮޅު ކައުންސިލުން ކުރައްވާ ބުރަ މަސައްކަތް ފާހަގަކޮށް އެ ފަރާތްތަކަށް ވަރަށް އިޚުލާޞްތެރިކަމާ އެކު ޝުކުރު ދަންނަވަން
ޝުޖާއު ވިދާޅުވިއެވެ.
ޝުޖާއު ވަނީ ހއ.އަތޮޅުގެ 14 ރަށުގެ ކައުންސިލުތަކުން ކުޅިވަރު ކުރިއެރުމަށް ޓަކައި އެ ކައުންސިލްތަކަށް ލިއްބައިދޭ މަދު ފައިސާކޮޅުން ބުރަ މަސައްކަތެއް ކުރަމުން އަންނަކަމަށް ވިދާޅުވެފައެވެ.
މި އަހަރު ތެރޭގައި ގާތްގަނޑަކަށް އަޅުގަނޑު ހަނދާންވާ ގޮތުގައި ތިން، ހަތަރު މުބާރާތް ހއ.އަތޮޅު ކައުންސިލުން ބާއްވައިފި. މިއީ މި ދަންނަވަނީ ހުރިހާ ރަށު ކައުންސިލުތަކާ ގުޅިގެން ހިންގޭ މުބާރާތްތަކުގެ ވާހަކަ. މީގެ ތެރެއިން އުފެދިގެން މި އަންނަނީ އަޅުގަނޑުމެން މާޒީގައި ދެކުނު އެއްބައިވަންތަކަމާއި އަޚުވަންތަކަން، އެއް ރަށާއި އަނެއް ރަށަށް އޮންނަ ގުޅުން
ޝުޖާއު ވިދާޅުވިއެވެ.
ކޮމެންޓްސް (0)