މަގުމަތީގައި ދޫކޮށްލާފައި ހުރި ވެހިކަލްތައް ނެގުމަށް އަންގައި އައްޑޫ ސިޓީ ކައުންސިލުން އިޢުލާނު ކޮށްފިއެވެ.
ކައުންސިލުން ފާހަގަކޮށްފައިވާ ގޮތުގައި، ހިތަދޫގައި ހިންގާ ސަރވިސް ގަރާޖުތަކުގެ ކުރިމަތިން މަގުމަތީގައި ގަވާއިދާ ޚިލާފަށް ގިނަ އަދަދެއްގެ ވެހިކަލްތައް މަރާމާތު ކުރުމަށް ގެންގޮސް ބަހައްޓާފައި ހުރެއެވެ. މިފަދައިން މަގުމައްޗަށް ވެހިކަލްތައް ދޫކޮށްލުމަކީ މަގު ބޭނުންކުރާ ފަރާތްތަކަށް ދަތިވުމުގެ އިތުރުން ނުރައްކާތެރި އެކްސިޑެންޓުތަކަށް މަގުފަހިވާ ކަމެއްކަމަށް ކައުންސިލުން ބުނެފައިވެއެވެ.
މި ސަބަބަށްޓަކައި، އެ ސަރަހައްދުތަކުގައި ބަހައްޓާފައިވާ ވެހިކަލްތައް އޭގެ ވެރިފަރާތްތަކުން މިއަދުން ފެށިގެން 5 ދުވަހުގެ ތެރޭގައި ނެގުމަށް ކައުންސިލުން އަންގާފައިވެއެވެ. މި މުއްދަތުގެ ތެރޭގައި މި ތަކެތި ނުނަގައިފިނަމަ، “އާންމު ތަންތަނަށާއި މަގުމައްޗާއި ފަޅުތެރެއަށް ދޫކޮށްފައިވާ ތަކެތި ނެގުމާބެހޭ ގަވާއިދު” ގައިވާ ގޮތުގެ މަތިން އެ ތަކެއްޗަކީ ދޫކޮށްލާފައިވާ ތަކެތި ކަމުގައި ކަނޑައަޅައި، ފުލުހުންގެ އެހީތެރިކަމާއެކު އެ ސަރަހައްދުން އެ ތަކެތި ނަގައި ޓޯކުރާނެ ކަމަށް ކައުންސިލުން އިންޒާރު ދީފައިވެއެވެ.
ކޮމެންޓްސް (0)