އިންޑިޔާއަށް އަސްކަރީ ޑްރޯން ވިއްކަން އެމެރިކާއިން މަސައްކަތް ކުރަނީ

އިންޑިޔާގެ ބޮޑުވަޒީރު ނަރެންދްރަ މޯދީ މި މަހުގެ ފަހުކޮޅު އެމެރިކާއަށް ކުރައްވަން ހަމަޖެހިފައިވާ ދަތުރުފުޅުގައި އިންޑިޔާއަށް އަސްކަރީ ޑްރޯންތަކެއް ވިއްކުމާ ގުޅޭ އެއްބަސްވުމެއް އެކުލަވައިލުމަށް އެމެރިކާއިން މަސައްކަތް ކުރަމުން އެބަދެއެވެ. މި މަހުގެ 22 ވަނަ ދުވަހު މޯދީ އެމެރިކާއަށް ވަޑައިގަންނަވަން ވަނީ ހަމަޖެހިފައެވެ. އެ ދަތުރުފުޅުގައި އޭނާ ރައީސް ޖޯ ބައިޑަނާ ބައްދަލުކުރައްވާނެއެވެ.

އެމެރިކާގައި އުފައްދާ “އެމް.ކިޔު-9ބީ” މަރުކާގެ “ސީގާޑިއަން” އަސްކަރީ ޑްރޯން ގަތުމަށް އިންޑިޔާއިން މީގެ ކުރިން ވެސް ވަނީ ޝައުޤުވެރިކަން ފާޅުކޮށްފައެވެ. މޯދީގެ ދަތުރުފުޅުގައި ސީގާޑިއަން ޑްރޯން ގަތުމާ ގުޅޭ ގޮތުން މަޝްވަރާ ކުރައްވާނެ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އަދި، އެ ކަމާ ގުޅޭ އެއްބަސްވުމެއް އެކުލަވައިލުމަށް ވައިޓް ހައުސްގެ އިތުރުން އެމެރިކާގެ ޚާރިޖީ ވުޒާރާއާއި ދިފާޢީ އިދާރާ ޕެންޓަގަންއިން ވެސް ދަނީ މަސައްކަތް ކުރަމުންނެވެ.

އިންޑިޔާއަށް ސީގާޑިއަން މަރުކާގެ 30 ޑްރޯން ވިއްކުމަށް އެމެރިކާއިން ބޭނުންވެއެވެ. އޭގެ އަގު އަހަރަކު 2 ނުވަތަ 3 ބިލިޔަން ޑޮލަރަށް އަރާނެ ކަމަށް ބެލެވެއެވެ. މި ކަމަށް މި ވަގުތު ހުރަސް އެޅިފައި އޮތީ އިންޑިޔާގެ އިދާރީ މައްސަލަތަކެއްގެ ސަބަބުންނެވެ. އިންޑިޔާއިން ގަންނަން ބޭނުންވަނީ ކިތައް ޑްރޯން ކަން އަދި ސާފެއް ނޫނެވެ. މި މަޢުލޫމާތު ހާމަކޮށްފައިވާ ނަން ހާމަކުރަން ބޭނުން ނުވާ މަސްދަރުތަކުންނެވެ. އަދި، އެމެރިކާގެ އެއްވެސް ރަސްމީ އިދާރާއަކުން މި ކަމާ ގުޅޭ ގޮތުން އެއްޗެއް ހާމަކޮށްފައެއް ނެތެވެ.

މޯދީގެ ދަތުރުފުޅުގައި އަސްކަރީ ދާއިރާއިން ދެ ޤައުމުގެ ދެމެދުގައި ގުޅުން ބަދަހިކުރުމަށް ވެސް ފުޅާ ދާއިރާއެއްގައި މަޝްވަރާ ކުރާނެ ކަމަށް ބެލެވެއެވެ. އަދި، ދެ ޤައުމުން ގުޅިގެން ހަތިޔާރާއި، ހަތިޔާރަށް ބޭނުންވާ ވަޒަން ނުވަތަ ޝެލްގެ އިތުރުން އަސްކަރީ އުޅަނދުފަހަރު އުފެއްދުމާ ގުޅޭ ގޮތުން މަޝްވަރާ ކުރަން ހަމަޖެހިފައިވާ ކަމުގައި މަސްދަރުތަކުން ބުނެއެވެ.

އިންޑިޔާއާ އެކު ގާތް ގުޅުންތަކެއް ބޭއްވުމަކީ ބައިޑަންގެ ޚާރިޖީ ސިޔާސަތުގެ މުހިންމު ނުކުތާއެކެވެ. މި ކަމުގެ އެއް ބޭނުމަކީ، އޭޝިޔާ އަދި ފެސިފިކްގެ ސަރަޙައްދުތަކުގައި ހަންފަތުރަން ޗައިނާއިން ކުރަމުންދާ މަސައްކަތްތަކަށް ހުރަސް އެޅުމެވެ. އެމެރިކާއާއި އިންޑިޔާއަކީ ދުނިޔޭގައިވާ އެންމެ ބޮޑު ދެ ޑިމޮކުރަސީ ކަމުގައިވާއިރު، ދެ ޤައުމުގެ ދެމެދުގައި އަސްކަރީ ގުޅުން ބަދަހިކުރުމަކީ ބައިޑަން އިސްކަންދެއްވާ ކަމެކެވެ.

ނަމަވެސް، ރަޝިޔާ-ޔޫކްރެއިން ހަނގުރާމައާ ގުޅޭ މައްސަލައިގައި އެމެރިކާ އޮތީ އިންޑިޔާއާ މެދު ހިތްހަމަނުޖެހިފައެވެ. ސަބަބަކީ، އިންޑިޔާއިން ރަޝިޔާއާ އެކު ގާތް ގުޅުންތަކެއް ބާއްވަމުން ދިޔުމެވެ. އެ ދެ ޤައުމުގެ ދެމެދުގައި އަސްކަރީ ދާއިރާއިންނާއި އިޤުތިޞާދީ ގޮތުން ދަނީ ގުޅުންތައް ބަދަހިކުރަމުންނެވެ.

މޯދީ އިންޑިޔާއަށް ކުރައްވަން ހަމަޖެހިފައިވާ ދަތުރުފުޅަށް ތައްޔާރުވުމުގެ ގޮތުން ދެ ޤައުމުގެ ދެމެދުގައި މަޝްވަރާތައް ބޭއްވުމަށް ބައިޑަންގެ ޤައުމީ ސަލާމަތާ ބެހޭ މުޝީރު ޖޭކް ސަވިލަން ވަނީ އިންޑިޔާއަށް ވަޑައިގަންނަވާފައެވެ. މި ދަތުރުފުޅުގައި ޑްރޯންގެ ވިޔަފާރިއާ ގުޅޭ ގޮތުން އިންޑިޔާގެ ދިފާޢީ ދާއިރާގެ އިސްވެރިންނާ އޭނާ މަޝްވަރާ ކުރައްވާނެ ކަމަށް ބެލެވެއެވެ.

ސީގާޑިއަން މަރުކާގެ ޑްރޯނަށް ބޭނުންވާ ބައެއް ސާމާނު އިންޑިޔާގައި އުފެއްދުމަކީ ވެސް އެ ޤައުމުން ބޭނުންވާ ކަމެކެވެ. ނަމަވެސް، މި ކަމަށް އެމެރިކާއިން ރުހޭނެ ކަމާ މެދު ވަނީ ސުވާލު އުފެދިފައެވެ. އެމެރިކާއާއި އިންޑިޔާ ހިމެނޭ ކުއޮޑްގެ ޤައުމުތަކުން މިހާރު ވެސް ދަނީ ސީގާޑިއަން މަރުކާގެ ޑްރޯން ބޭނުން ކުރަމުންނެވެ. އިންޑިޔާއިން ބޭނުން ކުރަނީ ކުއޮޑުން ކުއްޔަށް ދޫކޮށްފައިވާ ސީގާޑިއަން ޑްރޯންތަކެކެވެ. އެމެރިކާއާއި އިންޑިޔާގެ އިތުރުން ކުއޮޑްގެ މެންބަރު ޤައުމުތަކުގެ ތެރޭގައި ހިމެނެނީ އޮސްޓްރޭލިޔާއާއި ޖަޕާނެވެ.

މަސްދަރު : ޕީއެސްއެމް ނިއުސް