މި ސަރުކާރުން އެއްވެސް މުވައްޒަފަކަށް ވަޒީފާގެ ބިރެއް ނުދައްކާނެކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު މިއުވާން މުޙައްމަދު ވިދާޅުވެއްޖެއެވެ.
މިއުވާން މިހެންވިދާޅުވީ ސަރުކާރުގެ މަސައްކަތްތައް ހިނގާގޮތް ހާމަކުރުމަށް ކޮންމެ ބުރާސްފަތި ދުވަހަކު ރައީސް އޮފީހުގައި ބާއްވަމުންދާ ސިލްސިލާ ނޫސްވެރިންގެ ބައްދަލުވުމުގެ ތެރެއިން މިދިޔަ ބުރާސްފަތި ދުވަހު ބޭއްވި ބައްދަލުވުމުގައި، އެމްޑީޕީގެ ރިޔާސީ ޕްރައިމަރީއާއި ގުޅިގެން ސަރުކާރު އޮފީސްތަކުގެ އެކި މަގާމުތަކުގައާއި ކުންފުނިތަކުގެ އެކި މަގާމުތަކުގައި މަސައްކަތް ކުރާ މުވައްޒަފުންނަށް ބިރު ދައްކަމުންދާކަމަށް ބައެއް ފަރާތްތަކުން ބުނަމުންދާ ވާހަކައަކީ ކިހާވަރެއްގެ ހަގީގަތެއް އެކުލެވޭ ވާހަކައެއްތޯ ރަސްއޮންލައިނުން ދެންނެވި ސުވާލެއްގެ ޖަވާބުގައެވެ.
” އެއްވެސް އިންތިހާބަކާއި ގުޅިގެން ސަރުކާރުގެ އިދާރާތަކުގައި މަސައްކަތް ކުރާ މުވައްޒަފަކަށްވެސް އަދި ކުންފުނިތަކުގައި މަސައްކަތް ކުރާ މުވައްޒަފަކަށް ވެސް އެއްވެސްކަހަލަ ބިރެއް މި ސަރުކާރުން ނުދައްކާނެ” މިއުވާން ވިދާޅުވިއެވެ.
އެއީ އެތެރޭގެ އިންތިހާބެއްވިޔަސް އަދި އެނޫން އިންތިހާބެއް ވިޔަސް މި ސަރުކާރުން އެފަދަ އެއްވެސް ބިރުދެއްކުމުގެ ކަމެއް ނުކުރާނެކަމަށް މިއުވާން ވިދާޅުވިއެވެ.
މިއުވާން މިފަދައިން ވިދާޅުވެފައިވާއިރު ޕްރައިމަރީއާއި ގުޅުވައިގެން ސަރުކާރުން މުވައްޒަފުންނަށް ބިރު ދައްކަމުންދާކަމަށް އެމްޑީޕީގެ ރައީސް ނަޝީދުގެ ފެކްޝަނުން ދަނީ ބުނަމުންނެވެ.
ކޮމެންޓްސް (0)