ރާއްޖެއިން ބޭރުން ކެންސަރަށް ފަރުވާ ހޯދަން އާސަންދަ ދިނުން ހުއްޓާނުލާ ކަމަށް އާސަންދަ އޮފީހުން ބުނެފިއެވެ. ކެންސަރަށް ފަރުވާ ހޯދުމަށް އާސަންދަ ދިނުން ހުއްޓާލާފައިވާކަމަށްބުނެ، ބައެއް މީޑިއާތަކުން ފަތުރަމުންދާ ޚަބަރުތައް ދޮގުކޮށް، އާސަންދަ ކުންފުނީގެ މީޑިއާ އޮފިޝަލް އާޝިޔާ ސޯލިހު ވިދާޅުވީ ކެންސަރަށް ފަރުވާ ހޯދުމަށްދޭ އެއްވެސް ޚިދުމަތެއް ހުއްޓާނުލާކަމަށެވެ.
އަދި ރާއްޖެއިން ބޭރުން ކެންސަރު ބައްޔަށް ފަރުވާ ހޯދަންދާ މީހުންނަށް އާސަންދައިގެ ޙިދުމަތް މިހާރުވެސް ލިބޭނޭ ކަމަށް އާޝިޔާ ވިދާޅުވިއެވެ. އެހެންނަމަވެސް ރާއްޖެއިން ކެންސަރު ބައްޔަށް ލިބޭ ފަރުވާގެ ތެރޭގައި ހިމެނޭ ފަރުވާ އެއް ރާއްޖެއިން ބޭރުން ހޯދަން ހުށަހަޅައިފިނަމަ، އެޚިދުމަތެއް ރާއްޖެއިން ހޯދުމަށް އެފަރާތްތަކަށް އަންގަމުންދާ ކަމަށާއި، އެފަދަ ޚިދުމަތެއް ރާއްޖެއިން ނުދެވޭނެމަ އެއަށްވެސް އާސަންދަ ދެމުންދާކަމަށް އޭނާ ވިދާޅުވިއެވެ. އެގޮތުން ކީމޯ ތެރަޕީ ގެ ޙިދުމަތް މި ހާރުވެސް ރާޢްޖެއިން ލިބޭކަން ފާހަގަކުރައްވާ މިފަދަ ކަންކަމަށް އާސަންދަ ނުދޭނެކަމަށް އާޝިޔާ ވިދާޅުވިއެވެ.
ކެންސަރަށް ހޯދާ ބައެއްކަހަލަ ފަރުވާގެ ތެރޭގައި ރޭޑިއޮލޮޖީ ފަދަ ޙިދުމަތްތަކަށް ރާއްޖެ އިން ބޭރުން ފަރުވާ ހޯދުމަށްޓަކައި މި ހާރުވެސް އާސަންދަ ދޭ ކަމަށް އާޝިޔާ ވިދާޅުވިއެވެ. ހުސްނުވާ އާސަންދައަކީ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރަށް ސަތޭކަ ދުވަސް ފުރުމުގެ ގޮތުން އިފްތިތާޙުކޮށްފައިވާ ޚިދުމަތެކެވެ.
ކޮމެންޓްސް (0)