ކޮވިޑް-19 އިން ރައްކާތެރިވުމަށް އެޗްޕީއޭއިން މީގެ ކުރީން އެކުލަވާލާފައިވާ ގައިޑްލައިނަށް ބޮޑެތި ބަދަލުތަކެއް ގެނައުމަށް ނިންމައިފިއެވެ.
އެޗްޕީއޭއިން ނެރުނު އިއުލާނެއްގައި ހާމަކޮށްފައިވާގޮތުން މިއަދުން ފެށިގެން ފަތުރުވެރިން ފިޔަވައި ރާއްޖެއިން ބޭރުން އަންނަ ފަރާތްތަކާއި، މާލެއިން ރަށްރަށަށްދާ ފަރާތްތައް އަދި ގެސްޓްހައުސް ހިންގާ ރަށްރަށުން އެހެން ރަށްރަށަށްދާ މީހުންގެ ކަރަންޓީންވާންޖެހޭ މުއްދަތަކީ ދިހަ ދުވަސްކަމަށް ވަނީ ނިންމާފައެވެ. އަދި މިގޮތައް 10 ދުވަހަށް ކަރަންޓީން ކުރެވޭ ފަރާތްތައް ކަރަންޓީނުން ދޫކުރެވޭނީ ނެގެޓިވް ޕީސީއާރު ޓެސްޓަކާއި އެކުގައިކަމަށްވެސް އެޗްޕީއޭގެ އިއުލާނުގައި ހާމަކޮށްފައިވެއެވެ.
މީގެ އިތުރުން މީހުން ދިރިއުޅޭ ރަށްރަށާއި އެއާޕޯޓް ހިންގާ ރަށްރަށުގައި ރައްކާތެރިވުމުގެ ގޮތުން މާސްކް އެޅުމަށްވެސް ވަނީ އަންގާފައެވެ. އަދި ބޭރު ތެރޭގައި އުޅޭއިރު ގައިދުރުކަން ބެހެއްޓުމަށްވެސް އެޗްޕީއޭގެ ލިއުމުގައި ވަނީ އެދިފައެވެ.
މި އުސޫލަށް އަމަލުކުރަން ޖެހޭނީ މިއަދުން ފެށިގެން ދަތުރުކުރާ ފަރާތްތަކަމަށްވެސް އެޗްޕީއޭގެ އައުގައިޑްލައިނުގައިވަނީ ހާމަކޮށްފައެވެ.
އެޗްޕީއޭގެ އައު ގައިޑްލައިނުގައި އިތުރަށް ހާމަކޮށްފައިވާގޮތުގައި ޕޮޒިޓިވް ކޭސްތަކާއި އެފަރާތްތަކާއި ކޮންޓެކްޓްވާ ބަލިމީހުން ކަރަންޓީންގައި އަދިވެސް 14 ދުވަސް ތިބެންޖެހޭނެކަމަށް ބުނެފައިވެއެވެ.
ކޮމެންޓްސް (0)