އައްޑޫ ސިޓީގައި ޤާއިމްކުރާ ޓާޝަރީ ހޮސްޕިޓަލް ވެގެންދާނީ އެ ސަރަހައްދުގައި ހުރި އެންމެ ރީތި އަދި އެންމެ ހިތްގައިމު ހޮސްޕިޓަލަށް ކަމަށް ހެލްތް މިނިސްޓަރ އަބުދުﷲ ނާޒިމް ވިދާޅުވެއްޖެއެވެ.
ޗެނަލް ތާރޓީންގެ ނިއުސްޓޯކް ޕްރޮގްރާމްގައި ވާހަކަ ދައްކަވަމުން ހެލްތް މިނިސްޓަރ އަބުދުﷲ ނާޒިމް ވިދާޅުވީ ނުވަ ސަތޭކަ މިލިޔަނެއްހާ ރުފިޔާ ޚަރަދުކޮށްގެން ކުރީގެ ރައީސް ނަޝީދުގެ ސަރުކާރުން އަޅާފައިވާ ކޮންވެންޝަން ސެންޓަރު އެތާގައި ހުރިއިރު، ސިޓީ ކައުންސިލަށް އެތަން ނުބެލެހެއްޓި ވީރާނާ ވަމުން ދިޔަކަން އައްޑޫ ސިޓީގެ ރައްޔިތުންނަށް މާ ރަނގަޅަށް އެނގޭނެ ކަމަށެވެ. އަދި އައްޑޫ ރައްޔިތުންގެ އެންމެ ބޮޑު ކަންބޮޑު ވުމަކީ ސިއްހީ ދާއިރާ ކަމަށްވާތީ ރައީސުލްޖުމްހޫރިއްޔާ އަބްދުﷲ ޔާމީންގެ ސިޔާސަތުގެ ދަށުން އެތަނުގައި ފެންވަރު ރަނގަޅު ޓާޝަރީ ހޮސްޕިޓަލެއް ޤާއިމް ކުރުމުގެ މަސައްކަތް މި ސަރުކާރުން ފަށާފައި ވާކަމަށް މިނިސްޓަރ ވިދާޅުވިއެވެ.
އެގޮތުން ހޮސްޕިޓަލްކައިރީގައި މިސްކިތަކާއި، އެ ހޮސްޕިޓަލަށް ބޭނުންވާ ސަރވިސް ބިލްޑިންގ އަކާއި ހިމެނިގެން ވަރަށް ފުރިހަމައަށް އެތަނުގެ މަސައްކަތް ނިމިގެންދާނެ ކަމަށް ވިދާޅުވިއެވެ. މިނިސްޓަރ ވިދާޅުވީ އެހެންކަމުން އެތަނުގެ މަސައްކަތް ނިމުމުން އެ ހޮސްޕިޓަލް ވެގެންދާނީ އެ ސަރަހައްދުގައިހުރި އެންމެ ރީތި އަދި އެންމެ ހިތްގައިމު ހޮސްޕިޓަލަށް ކަމަށެވެ.
“އިރާދަކުރެއްވިއްޔާ މާތްﷲ ސުބުޙާނަހޫ ވަތަޢާލާގެ މިންވަރުފުޅުން ރައީސް އަބުދުﷲ ޔާމީންގެ ހަރުދަނާ ސިޔާސަތުގެ ދަށުން އެތަން ވެގެންދާނީ މި ރީޖަންގައިވެސްހުރި، ހިތްގައިމު އެންމެ ރީތި ފުލް އެއަރކޯން ހޮސްޕިޓަލަކަށް. ހޮސްޕިޓަލްގެ ވަށައިގެން ރީތި ބަގީޗާލެވި، ކައިރީގައި މިސްކިތަކާ އަދި ހޮސްޕިޓަލަށް ބޭނުންވާ ސަރވިސް ބިލްޑިންގ އަކާއި ހިމެނިގެން ވަރަށް ފުރިހަމަ ހޮސްޕިޓަލަކަށް އެތަން ވެގެންދާނެ” މިނިސްޓަރ ވިދާޅުވިއެވެ.
ހޮސްޕިޓަލްގެ މަސައްކަތަށް އަލިއަޅުވާލައްވާ މިނިސްޓަރ ވިދާޅުވީ ކޮންސްޓްރަކްޝަންގެ މަސައްކަތް ވަރަށް ބާރު ސްޕީޑްގައި ކުރިއަށްދާކަމަށާ، އެތަނަށް ބޭނުންވާ މެޝިނަރީސް ގެނައުމުގައި ދަތިތަކެއް އުޅޭކަމަށެވެ. ނަމަވެސް އަވަސް މުސްތަގުބަލެއްގައި އެ މެޝިނަރީސްތައް ގެނެވޭނެކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ ސިއްޙީ ދާއިރާ އާއި ގުޅިގެން އައްޑޫ ރައްޔިތުން ދެކެމުން އަންނަ ހުވަފެންތައް ވަރަށް އަވަހަށް ހަޤީޤަތަކަށް ވެގެންދާނެ ކަމަށެވެ.
އައްޑޫ ސިޓީގައި ރައީސް ޔާމީންގެ ސަރުކާރުން އަޅާ ޓާޝަރީ ފެންވަރުގެ އެ ހޮސްޕިޓަލަކީ ދެހާސް އެގާރަ ވަނަ އަހަރުގެ ސާކް ސަމިޓަށް އައްޑޫގައި އެޅި އިކުއެޓޯރިއަލް ކޮންވެންޝަން ސެންޓަރު (އީސީސީ) ގައި މި ސަރުކާރުން ތަރައްޤީ ކުރާ 100 އެނދުގެ ހޮސްޕިޓަލެކެވެ.
މަސްދަރު: ޗެނަލް 13
ކޮމެންޓްސް (0)