އެމްޑީޕީގެ ރިޔާސީ ކެންޑިޑޭޓް ރައީސުލްޖުމަހޫރިއްޔާ އިބްރާހިމް މުހައްމަދު ސާލިހް އިލެކްޝަނަ ކޮމިޝަނަށް ފޯމު ހުށަހަޅައިފިއެވެ.
ރައީސްގެ ފޯމާއެކު އީސީ އަށް ވަޑައިގަތީ އެމަނިކުފާނުގެ އިންތިހާބީ އެޖެންޓް މުހައްމަދު ނާޝިޒް އާއި އަދި ކެމްޕޭނު މެނޭޖަރު މުހައްމަދު ރަޝީދު ހުސެން އެވެ. އަދި ފޯމާ ހަވާލުވެވަޑައިގެންނެވީ އީސީގެ ރައިސް ފުއާދް ތައުފީގެވެ. ރައީސްގެ ރަނިންމޭޓް ކަނޑައަޅުއްވާ، ހަމަޖައްސައިފައި ވަނީ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އެވެ.
ފުރަތަމަ ވެރިކަމަށް ވާދަކުރެއްވީ ގުޅިފައިވާ ޕާޓީތަކުގެ ކެންޑިޑޭޓެއްގެ ހައިސިއްޔަތުން ނެވެ. ނަމަވެސް މިހާރު އެމްޑީޕީއާއި ގުޅިފައި ވަނީ އެމްޑީއޭއާއި އާދާލަތު ޕާޓީއެވެ. ކޯލިޝަން ދަމަހައްޓަން ރައިސް އެދިވަޑައިގެންނެވި ނަމަވެސް އެމްއާރުއެމް އާއި ޖުމްހޫރީ ޕާޓީއިން ވަނީ ވަކިން ވާދަކުރައްވަން ނިންމަވާފައެވެ.
އެމްޑީޕީގެ ތެރޭގައި ބޭއްވި ޕްރައިމަރީގައި މަޖިލީހުގެ ރައީސް މުހައްމަދު ނަޝީދާއި ވާދަކޮށް ރައީސް އިބްރާހިމް މުހައްމަދު ސާލިހް ވަނީ 24566 ވޯޓުން ޕްރައިމަރީ ކާމިޔާބު ކުރައްވާފައެވެ. އަދި ނަޝީދަށް ލިބިވަޑައިގަންނަވާފައި ވަނީ 15641 ވޯޓެވެ.
މީގެއިތުރުން އިދިކޮޅުގެ އެންމެ ބޮޑު އަދި އެމްޑީޕީގެ ވާދަވެރި ޕާޓީ ޕީޕީއެމް އިން ވަނީ އަބްދުﷲ ޔާމިންގެ ކެންޑިޑެސީ ފޯމު އީސީ އިިން ބޭރުކޮށްލި މައްސަލަ ސުޕްރީމް ކޯޓަށް ހުށަހަޅާފައެވެ. ނަމަވެސް ސުޕްރީމް ކޯޓުން ވަނީ އީސީ އިން ނިންމި ނިންމުމަކީ ރަނގަޅު ނިންމުމެއް ކަމަށް ބަލައި ޔާމިން ގެ މައްޗަށް ސާބިތު ދަރައްޏެއް އޮތް ކަމަށް ވިދާޅުވެ ރިޔާސީ އިންތިހާބުގައި ވާދަ ނުކުރެވޭނެ ކަމަށް ހުކުމް ކޮށްފައެވެ.
ކޮމެންޓްސް (0)