ގައުމު ސްޓްރީޓް ކަޕް : ގިނަ ބައެއްގެ ފޭވަރިޓް އެއްޓީމުގެ ގޮތުގައި ބެލެވުނު ހަބޭސް ބަލިކޮށް ހިތަދޫ ރިވެރިން ފައިނަލަށް

މިރޭ ކުޅެވުނު ގައުމު ސްޓްރީޓް ކަޕްގެ ސެމީ ފައިނަލް ދެވަނަ މެޗުގައި ފޭދޫގެ ހަބޭސް ބަލިކޮށް  ހިތަދޫ  ކްލަބް ރިވެރިން  ފައިނަލުގެ ދެވަނަ ޖާގަ ހޯދައިފިއެވެ.

މިރޭގެ މެޗު ފެށިގެން ހަބޭސްގެ ކުޅުންތެރީން ރިވެރިން ގޯލަށް ނުރައްކާ ކުރަމުން ގޮސްފައި ވެއެވެ. މިގޮތުން ހަބޭސް އިން ލަނޑު ޖަހާނެ ގިނަ ފުރުސަތުތަކެއް ހޯދައި ދެންމެ ދެންމެ ގޯލެއް ކާމިޔާބު ކޮށްފާނެ ހެން ވެސް ހީވިއެވެ.

އެހެންނަމަވެސް ވަރަށް ބޮޑަށް ފަހަތަށް ޖެހި ކުޅެމުންދިޔަ ރިވެރިންގެ ކުޅުންތެރީން ލިބޭ ފުރުސަތުތަކުގައި ކުރިއަށްޖެހި ހަބޭސްގެ ގޯލަށް ފޮނުވަމުންދިޔަ ހަމަލާތަކުގެ ތެރެއިން މެޗްގެ 15 ވަނަ މިނިޓްގައި އެޓީމުގެ ހޫދު ލަޠީފް އާދައިގެ ގޮތަކަށް ފޮނުވާލި ބޯޅައެއް ހަބޭސްގެ ގޯލްތެރެއަށް ވަދެގެން ރިވެރިން އިން ވަނީ މެޗްގެ ލީޑު ހޯދާފައެވެ.

މިލަނޑަށްފަހުވެސް ހަބޭސްގެ ކުޅުންތެރީން އިތުރަށް ކުރިއަށްޖެހި ގިނަ ހަމަލާތަކެއް ރިވެރިންގެ ގޯލަށް ފޮނުވަމުން ގޮސްފައިވެއެވެ. އޭގެ ތެރެއިން ގިނަ ހަމަލާތަކެއް ރިވެރިންގެ ގޯލް ބަލަހައްޓަމުންދި ކުޅުންތެރިޔާގެ ފައިޖެހިފައި ބޭރަށް ގޮސްފައިވާއިރު ހަބޭސްގެ ކުޅުންތެރީން ފަހު ހާފްގެ ކުޅުމުގައި ފޮނުވާލި ބޯޅައެއް ގޯލް ރޮގު ހުރަސްކޮށް ގޯލްތެރެއަށް ވަދެފައިވާކަމަށްބުނެ އެޓީމްގެ ކުޅުންތެރީންނާއި އޮފިޝަލުން ވަރަށް ބޮޑަށް މައްސަލަ ޖެއްސިއެވެ. އެހެންނަމަވެސް ރެފްރީ މަސީހުވަނީ އެއީ ގޯލެއްނޫންކަމަށް ނިންމާފައެވެ.

އެއީ ގޯލެއް ނޫންކަމަށް ރެފްރީ ނިންމިއަސް ހަބޭސްގެ ކުޅުންތެރީން މައްސަލަ ޖެއްސި ބޯޅަ ގޯލް ރޮގު ހުރަސްވެފައިވާކަމަށް ފެންނަ ބައެއް ފޮޓޯތައްވަނީ ފެނިފައެވެ. އެހެން ނަމަވެސް އެބޯޅަ ގޯލް ރޮގު ހުސްކޮށްފައިވާއިރު ގޯލްހުރީ ކޮންމެވެސްވަރަކަށް ފަހަތަށް ޖެހިފައެވެ.

މިމެޗްގެ ކުޅުންނިމިގެންދިޔައީ މިމުބާރާތުގައި ވާދަކުރި ޓީމްތަކުގެ ތެރެއިން  ގިނަ ބައެއްގެ ފޭވަރިޓް އެއްޓީމުގެ ގޮތުގައި ބެލެވުނު  ފޭދޫ ހަބޭސް ބަލިވެ ހިތަދޫ ރިވެރިން ފައިނަލަށް ހޮވިގެންނެވެ.