ގައުމު ސްޓްރީޓް ކަޕް : ރޭ ކުޅެވުނު ދެމެޗުންވެސް މީދޫ ދެޓީމް ބަލިވެއްޖެ

ގައުމު ސްޓްރީޓް ކަޕް ގައި ރޭ ކުޅެވުނު މެޗްތަކުން މީދޫގެ ދެޓީމްވެސް ބަލިވެއްޖެވެ.

ރޭ 8:30 ގައި ކުޅެވުނު ގްރޫޕް ސީގެ  މެޗްގައި  މީދޫ ލޮތަރި އެފްސީއާއި ހުޅުދޫ މަންތަރަ ޖޫނިއާސް ބައްދަލުކުރިމެޗް   ކާމިޔާބުކޮށްފައިވަނީ ހުޅުދޫ މަންތަރަ ޖޫނިއާސްއެވެ

މަންތަރަ ޖޫނިއާސް މިމެޗް ކާމިޔާބުކުރީ  މީދޫ ލޮތަރި އެފްސީ ބައްދަލުކޮށް 2 ލަނޑު 1 ލަނޑުންނެވެ.

މިމެޗްގައި މަންތަރަ ޖޫނިއާސްއިން ކާމިޔާބުކުރި ދެ ލަނޑުވެސް އެ ޓީމަށް ކާމިޔާބުކޮށްދިނީ ޝުޖުއާން ޝަފީގެވެ.

ލޮތަރި އެފްސީއަށް މިމެޗްގައި ކާމިޔާބުކުރެވުނު ހަމައެކަނި ލަނޑު އެޓީމަށް ކާމިޔާބުކޮށްދީނީ މުންސިފެވެ.

މި މެޗުގެ މޮޅު ކުޅުންތެރިއަކަށް ހޮވުނީ މަންތަރަ ޖޫނިއާސް އަށް ދެ ލަނޑު ކާމިޔާބުކޮށްދިން ޝުޖުއާންއެވެ.

ރޭ 10:30 ގައި ކުޅެވުނު ގްރޫޕް ބީގެ މެޗްގައި މީދޫ ނޮރިންމަ އެފްސީވެސް ވަނީ ބަލިވެފައެވެ.

ނޮރިންމަ އެފްސީ ބަލިވެފައިވަނީ އެފްސީ އަފިރިން ޓީމާ ބައްދަލުކޮށް 1 ލަނޑު 0 ލަނޑުންނެވެ. މިމެޗުން އެފްސީ އަފިރިން މޮޅުވި ލަނޑު 38 ވަނަ މިނިޓްގެ ތެރޭގައި ކާމިޔާބުކޮށްދިނީ އިބްރާހިމް ސައިފްއެވެ.

 

މި މެޗުގެ މޮޅު ކުޅުންތެރިއަކަށް ހޮވުނީ އެފްސީ އަފިރިންގެ އިބްރާހިމް ސައިފްއެވެ.

ރޭ ކުޅެވުނު ދެމެޗުން މީދޫ ދެޓީމް ބަލިވެފައިވާއިރު އިއްޔެ ހަވީރު ކުޅެވުނު މެޗްގައި ހިތަދޫ އުސްގަޑަ ޖޫނިއާސްއާއި ވާދަކޮށް މީދޫ ޗެލެންޖާސް ކުޅުނު މެޗް ނިމިގެން ގޮސްފައިވަނީ 1 ލަނޑު 1 ލަނޑުން އެއްވަރުވެގެންނެވެ.