2007 ވަނަ އަހަރަށްފަހު ވެލެންސިޔާގެ ދަނޑުގައި ވެލެންސިޔާއަތުން ބާސެލޯނާ ބަލިވެއްޖެވެ. ސްޕެނިޝް ލީގުގައި ވެލެންސިއާގެ ދަނޑުގައި ރޭ ވެލެންސިޔާއަތުން 2 ލަނޑު 0 ލަނޑުން ބާސެލޯނާ ބަލިވުމާއެކު ބާސެލޯނާ އަށް ލީގުގެ އެއް ވަނަ ގެއްލުމުގެ ފުރުސަތުވަނީ ބޮޑުވެފައެވެ.
ރޭ ބާސެލޯނާ ބަލިވުމާ ބާސެލޯނާއަށްވުރެ އެއްމެޗު މަދުން ކުޅެފައިވާ ރެއާލް މެޑްރިޑް މިރޭ ކުޅޭމެޗުން އެއްވަރުވިޔަސް ލީގުގެ އެއް ވަނަ ރެއާލްއަށް ލިބިގެންދާނެއެވެ.
ރޭގެ މެޗްގައި ވެލެންސިއާ އަށް ފުރަތަމަ ހާފުގައި ލީޑުނަގަން ލިބުނު ފުރަތަމަ ފުރުސަތުގައި އެޓީމަށް ލިބުނު ޕެނަލްޓީ އަކުން މެކްސީ ގޯމޭޒް ފޮނުވާލި ބޯޅަ ބާސެލޯނާގެ ކީޕަރު އަންދްރޭ ސްޓެގެން ވަނީ ދިފާއުކޮށްފައެވެ. މިއީ ވެލެންސިއާގެ ގާޔާ އަށް ބާސެލޯނާގެ ޕީކޭ ކުރި ފައުލަކަށް ރެފްރީ ދިން ޕެނަލްޓީ އެކެވެ.
މިމެޗްގައި ވެލެންސިޔާއިން ކާމިޔާބުކުރި ފުރަތަމަ ލަނޑަކީ ވެލެންސިޔާގެ ގޮމޭޒް ނަގައިދިން ހުރަހެއް ބާސެލޯނާގެ ޑިފެންޑަރު ޖޯޑީ އަލްބާގެ ގައިގައި ޖެހި ބައިކޮޅަށް ވަދެގެން ކާމިޔާބުކުރެވުނު ލަނޑެކެވެ. ޖޯޑީ އަލްބާއަތުން ބައިކޮޅަށް ވަން ލަނޑަށްފަހު ބާސެލޯނާގެ ކުޅުން ވަރަށް ބޮޑުތަން ރަގަޅުކޮށް ގިނަ ހަމަލާތަކެއް އުފެއްދޭތޯ އެޓީމުން މަސައްކަތް ކުރި އެވެ. މިގޮތުން އެޓީމުގެ މެސީ ރޭގެ މެޗްގައިވަނީ ގިނަ ބޯޅަތަކެއް ވެލެންސިޔާގެ ގޯލަށް ފޮނުވާލާފައިވެއެވެ. އެެހެން ނަމަވެސް އެއިން އެއްވެސް ހަމަލާއެއް ގޯލަކަށް ވަންނަ ގޮތެެއް ނުވިއެވެ.
ކައުންޓާ އެޓޭކިންގް ފުޓުބޯޅަ ކުޅެމުންދިޔަ ވެލެންސިއާ އިން ރޭގެމެޗުގެ ކާމިޔާބުކުރި ދެވަނަ ގޯލު ކާމިޔާބުކުރީ މެޗުގެ 77 ވަނަ މިނިޓްގަ އެވެ. މި ގޯލު ޖެހީވެސް ފުރަތަމަ ގޯލްވެސް ކާމިޔާބުކުރުމަށް އެހީވި ގޯމޭޒް އެވެ.
ރޭގެ މެޗުން ބަލިވި ބާސެލޯނާއަށް 21 މެޗު ކުޅެގެން 43 ޕޮއިންޓް ލިބިފައިވާއިރު މިރޭ ރެއާލް ކުޅޭ މެޗުން އެ ޓީމު މޮޅުވެއްޖެ ނަމަ ރެއާލަށް 46 ޕޮއިންޓް ލިބި ބާސެލޯނާ ދެވަނައަށް ވެއްޓޭނެ އެވެ.
ކޮމެންޓްސް (0)