ސިޔާކަޕް ފުޓްބޯޅަ މުބާރާތުގައި މުބާރާތް އިންތިޒާމްކުރި ފަރާތުން ދެއްވި ޚާއްސަ ދައުވަތަކަށް މުބާރާތުގައި ބައިވެރި ސަބްއޯޝަނިކުން މުބާރާތުން ވަކިވެއްޖެވެ.
ސަބްއޯޝަނިކުން މުބާރާތުން ވަކިވެފައިވަނީ ކްލަބް ރެޑްއެންޓްސްއާއި އެޓީމު ބައްދަލުކުރިމެޗްގައި ރެފްރީ އެޓީމުގެ ކުޅުންތެރިއެއްކަމުގައިވާ ލައުހުއަށް ދެއްކި ރީދޫ ކާޑު މައާފްކޮށްދިނުމަށް މުބާރާތުގެ ޑިސިޕްލިނަރީ ކޮމިޓީއަށް އެޓީމުގެ ފަރާތުން ލިއުމުން ހުށަހެޅި މައްސަލަ ބެލުމަށްފަހު އެކާޑަކީ ރަގަޅުކާޑެއް ކަމަށް ބަލައި އެކާޑް މައާފްކުރެވެން ނެތްކަމަށް ޑިސިޕްލިނަރީ ކޮމިޓީން އެންގުމާއިގުޅިގެންނެވެ.
ކްލަބްރެޑްއެންޓްސްއާއި ސަބްއޯޝަނިކް ބައްދަލުކުރިމެޗްގައި ރެފްރީ ސަބްއޯޝަނިކްގެ ލައުހުއަށް ދެއްކި ރީދޫ ކާޑާއިމެދު ހިތްހަމަނުޖެހިގެން އެޓީމުގެ ކުޅުންތެރީންނާއި އޮފިޝަލުން މެޗުނިމިގެން ރެފްރީއާއި އަދި މުބާރާތް އޮގަނައިޒްކުރާފަރާތަށް ވަޑަށްބޮޑަށް ނުރުހުމުގެ ބަސްތައް ބުނަމުންގޮސްފައިވެއެވެ. އަދި ސޯޝަލް މީޑިއާގައިވެސް އެޓީމުގެ ބައެއް ކުޅުންތެރީން ހުޅުދޫއާއި މީދޫ މީހުންނަކީ މިފަދަ މުބާރާތްތައް ރާވާ ހިންގޭނެ ބައެއް ނޫންކަމަށްބުނެ ފާޑުކިޔާފައިވެއެވެ.
ކްލަބްރެޑްއެންޓްސްއާއި ސަބްއޯޝަނިކް ބައްދަލުކުރިމެޗްގައި ސަބްއޯޝަނިކްގެ ލައުހުއަށް ރީދޫ ކާޑު ދެއްކި ރެފްރީ މާއިޝް މުހައްމަދަކީ ކެނެރީފް ރިސޯޓްގައި މަސައްކަތްކުރާ މުވައްޒަފަކަށްވެފައި ސަބްއޯޝަނިކަކީ ކެނެރީފް ރިސޯޓުން މިމުބާރާތުގައި ބައިވެރިވެފައިވާ ޓީމަކަމަށްވާތީ ރެފްރީ އެޓީމުގެ ކުޅުންތެރިއަކަށް ދައްކަން ނުޖެހޭ ކާޑެއް ދައްކަފާނެކަމަށް ނުބެލެވެއެވެ.
ރެފްރީ މާއިޝް މުހައްމަދު ސަބްއޯޝަނިކްގެ ލައުހުއަށް ދެއްކި ރީދޫ ކާޑުގެ މައްސަލަ ޖެއްސުމުގައި އިސްކޮށްހުރި ސަބްއޯޝަނިކުގެ ޖޯޒީ ނަމްބަރު 10 މުހައްމަދު އަމީތު ސަބްއޯޝަނިކާއި ރެޑްއެންޓްސް ބައްދަލުކުރި މެޗްގައި ދަނޑުމަތީގައިހުރެ ރެފްރީގެ ނިންމުމާއި ދެކޮޅަށް އަޑުގަދަކޮށްފައިވެއެވެ. އަދި ބެންޗުގައިހުރެފައި ކޮޅަށް ތެދުވެ ރެފްރީގެ ނިންމުންތަކާއި ކަނޑައެޅިގެން ދެކޮޅު ހަދަމުންދިޔައިރުވެސް އެކަމާއިގުޅިގެން ރެފްރީ މާއިޝް އޭނާއަށް އެއްވެސް އިންޒާރެއް އަދި ކާޑެއްވެސް ދައްކާފައިނުވާކަން ފާހަގަކޮށްލަންޖެހެއެވެ.އެހެންނަމަވެސް މިމުބާރާތުގެ ބައެއްމެޗްތަކުގައި ރެފްރީ މާއިޝްގެ ނިންމުންތަކާއި ދެކޮޅަށް ވާހަކަ ދެއްކުމުން ރީދޫކާޑާއި ރަތްކާޑުވެސް ރެފްރީ މާއިޝް ދައްކާފައިވާކަންވެސް ފާހަގަކޮށްލަންޖެހެއެވެ.
ސަބްއޯޝަނިކު މުބާރާތުން ވަކިވިއިރު އެޓީމު މުބާރާތުގައި ކުޅުނު ތިންމެޗުގެ ތެރެއިން އެއްމެޗުން ދެރަވެ އެއްމެޗުން އެއްވަރުވެ އަދި އެއްމެޗުން މޮޅުވެ 4 ޕޮއިންޓް ލިބިފައިވާއިރު އެޓީމު ދެން މިމުބާރާތުގައި ކުޅެންޖެހޭ މެޗަކީ ގައުމު ޖޫނިއާސްއާއި ބައްދަލުކުރާމެޗްކަމަށްވާތީ އެޓީމަށް އެމެޗް ކާމިޔާބުކޮށްގެން މިމުބާރާތުގެ ފައިނަލަށް ދިއުމުގެ ފުރުސަތުވެސް އޮތީ ތަނަވެސް ވެފައެވެ.
ކޮމެންޓްސް (0)