މިޤަރުނުގެ އެންމެ ދިގު ހަނދުކޭތަމިރޭ ހިފާނެ

މިރެއަކީ  ފަލަކީ ކަންކަމަށް ޝައުޤުވެރިކަން ހުންނަ މީހުންނަށް ވަރަށް ޚާއްސަ ރެއެކެވެ. މިޤަރުނުގައި (2001 އިން 2100) ހިފާ އެންމެ ދިގު، ފުރިހަމަ ހަނދު ކޭތަ މިރޭ ފެންނާނެއެވެ. ޒުލްޤައިދާމަހުގެ 15 ވިލޭރޭ ހިފާ މިހަނދުކޭތަ، މޫސުން ގޯސް ނުވާނަމަ ދުނިޔޭގެ ގިނަ ހިސާބުތަކަށް ވަރަށް ސާފުކޮށް ފެންނާނެއެވެ.
އިރުކޭތަ އަދި ހަނދުކޭތަ ހިފަނީ، ދުނިޔެ ވަށައިގެން ހަނދު ދައުރުކޮށް، އަދި އިރު ވަށައިގެން ދުނިޔެއާއި ހަނދު ދައުރުކުރާތީ އެވެ. އެތަކެތި ދައުރުކުރަމުންދާއިރު، ބައެއްފަހަރު، އިރާއި ދުނިޔެއާ ދެމެދަށް ހަނދު ވަދެއެވެ. މިހެންވާއިރު ހިފަނީ އިރުކޭތަ އެވެ. ބައެއްފަހަރު، އިރާއި ހަނދާ ދެމެދަށް ދުނިޔެ ވަދެއެވެ. މިހެން ވާއިރު، ހިފަނީ، ހަނދުކޭތަ އެވެ.

ހަނދު ކޭތަ ހިފާއިރު، އިރާއި ހަނދާ ދެމެދަށް ދުނިޔެ ވަނުމުން ގޮއްޓެއްގެ ސިފައިގައި އޮންނަ ހިޔާގަނޑެއް އުފެދެއެވެ. އެގޮށީގެ ތެރޭގައި ހިމެނޭ ބައިގައި ހިފާނީ މުޅި ހަނދު ކޭތައެއް، ނުވަތަ ފުރިހަމަ ހަނދު ކޭތައެކެވެ. އެ ގޮށީގެ އަރިމަތިން އުފެދޭ މަޑު ހިޔާގަނޑުގެ ތެރޭގައި ހިމެނޭ ބައިގައި ހިފާނީ ފަޅި ކޭތައެކެވެ. ފުރިހަމަ ހަނދުކޭތަ ހިފާނީ، އިރާއި ހަނދާއި ދެމެދަށް ދުނިޔެ ވަދެ، މި ތިނެތި އެއް ރޮނގެއްގެ މަތީގައި ސީދާވާ އިރުގައެވެ.
މިރޭ ފުރިހަމަ ހަނދުކޭތަ ހިފަން ފެށުމުގެ ކުރިން މިރޭ 11:24 ގައި ފަޅި ހަނދު ކޭތައެއް ހިފަންފަށާނެއެވެ. ފަޅިކޭތައަށްފަހު ފުރިހަމަ ހަނދުކޭތަ ހިފަން ފަށާނީ ރާއްޖެ ގަޑިން ދަންވަރު 12:30 ހާއިރުއެވެ. މިރޭ މެންދަމު 1:21 ހާއިރު ހުންނާނީ ފުރިހަމަ ހަނދުކޭތައެއް ހިފާފައެވެ. އެވަގުތު ހަނދު ފެންނަނީ ރަތް އޮރެންޖު ކުލައެއްގައެވެ. މިއީ އިރުގެ އަލި ދުނިޔޭގެ ވައިގެ ފަށަލަތަކުގެ ތެރެއިން ގޮސް ހަނދަށް އެޅޭތީ ފެންނަ ކުލައެކެވެ. މުޅި ހަނދުކޭތަ ގާތްގަނޑަކަށް އެއް ގަޑިއިރާއި 43 މިނެޓް ވަންދެން ހިފާފައި ހުންނާނެއެވެ. އެހެންކަމުން މިއީ މިޤަރުނުގައިވެސް ފެންނާނެ އެންމެ ދިގު ފުރިހަމަ ހަނދުކޭތައެވެ.

ޚަބަރުތައް ބުނާގޮތުން އުތުރު އެމެރިކާގެ ސަރަޙައްދުތަކަށް ހަނދުކޭތަ އެއްވެސް ވަރަކަށް ނުފެންނާނެއެވެ. އެއީ ހަނދުކޭތަ ހިފާ ވަގުތު އުތުރު އެމެރިކާއަށް ހަނދު އޮއްސިފައި ހުންނާނެތީއެވެ. ޔޫރަޕާއި އިރުމަތީ އޭޝިޔާ، އޮސްޓްރޭލިއާއާއި ބައެއް އެހެނިހެން ސަރަޙައްދުތަކަށް ފެންނަނީ ފަޅި ކޭތައެކެވެ. ނަމަވެސް އިރުމަތީ އެފްރިކާ، މެދުއިރުމަތި އަދި ސެންޓްރަލް އޭޝިޔާގެ ޤައުމުތަކާއި ރާއްޖެ ހިމެނޭ އިންޑިއާ ކަނޑުގެ ޖަޒީރާތަކަށް މޫސުން ގޯސް ނޫންނަމަ މިރޭ ހިފާ ފުރިހަމަ ހަނދުކޭތަ ވަރަށް ރީތިކޮށް ފެންނާނެއެވެ.
ލޮލަށް ލިބިދާނެ ގެއްލުމަކުން އިރުކޭތަ ބެލުމަށް ޚާއްސަ އާލާތްތައް ބޭނުންކުރިޔަސް، ހަނދުކޭތަ ބެލުމަށް މިފަދަ އެއްވެސް އެއްޗެއް ބޭނުމެއް ނުވާނެއެވެ. މިރޭ ހިފާ ހަނދުކޭތަ ވާނީ ދުނިޔެ މައްޗަށް މިހާތަނަށް ފެނުނު އެންމެ ދިގު ހަނދުކޭތައަށެވެ.

މަސްދަރު: ޕީއެސްއެމް

  • ކޮމެންޓްސް (0)

Your email address will not be published. Required fields are marked *

  • ފުރިހަމަ ނަން

Ads

ގުޅޭ ލިޔުންތައް

ޒަމާނުންސުރެ ރާއްޖެ ބައްޓަން ކުރަމުން އައި ގޮތުގެ ހިތި ނަތީޖާ މިއަދު މިވަނީ ފެނިފައި: ޔާސިރު

މާލެ ތޮއްޖައްސައި، ހުރިހާ ހިދުމަތެއް ލިބެން ހުންނަ ޖެހޭނީ މާލޭންކަމަށް ދެކި އެ ވިސްނުމުގައި ޒަމާނުންސުރެ ރާއްޖެ ބައްޓަން ...

މިނިވަންކަޕް 2022 ޔޫތު ޗެލެންޖް- ފުރަތަމަ މެޗް ތަފާތު ބޮޑު ނަތީޖާއަކުން ކްލަބު ލޮތާރިން ކާމިޔާބުކޮށްފި

ކްލަބް ލޮތާރިން ފާހި ސްޕޯޓްސް ކްލަބު ތަފާތު ބޮޑު ނަތީޖާއަކުން ބަލިކޮށްފި އެވެ. ” މިނިވަންކަޕް 2022 ޔޫތު ...

ރާއްޖޭގައި މީހުން ދިރިއުޅޭ ހުރިހާ ރަށެއްގައި މާސްކް އަޅަން އަންގައިފި

މީހުން ދިރިއުޅޭ ރަށްރަށުގައި މާސްކް އަޅަން އެޗްޕީއޭއިން އިއުތިމާސްކޮށްފި . މިހާރު ކުރިއަށްގެންދާ ނޫސްވެރިންގެ ބައްދަލުވުމެއްގައި ވިދާޅުވީ، މާލެ ...