މާލޭގެ މަގުތަކުގައި ހުރި ޑިސްޓްރިބިއުޝަން ފޮށިތަކާއި ސަބް ސްޓޭޝަންތައް ސާފުކުރުމުގެ މަސައްކަތް، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މިއަދު ފަށައިފިއެވެ.
“ޗާލު ވެށި – މަގޭ ޒިންމާ” ގެ ނަމުގައި ކުރިއަށްގެންދާ މި މަސައްކަތް ފައްޓަވައިދެއްވީ މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމާއި، މާލެ ސިޓީގެ މޭޔަރ އާދަމް ޢާޒިމް އަދި ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީއެވެ.
ސްޓެލްކޯއިން މަޢުލޫމާތު ދެއްވިގޮތުގައި މި މަސައްކަތުގެ ދަށުން ކުންފުނީގެ މުވައްޒަފުން ޑިސްޓްރިބިއުޝަން ފޮށިތަކާއި ސަބް ސްޓޭޝަންތަކުގައި ތަތްކޮށްފައިވާ އިޝްތިހާރުތަކާއި ޕޯސްޓަރުތައް ނައްޓައި، އެތަންތަން ސާފުކުރާނެއެވެ.
މުޅި ރާއްޖޭގައި ސްޓެލްކޯގެ ޑިސްޓްރިބިއުޝަން ފޮށިތަކާއި ސަބް ސްޓޭޝަންތައް ޤާއިމުކޮށްފައިވާއިރު، ޚާއްޞަކޮށް އިންތިޚާބުތަކާ ގުޅިގެން އެތަންތަނުގައި ކެމްޕޭނު ޕޯސްޓަރުތައް ހަރުކުރުމުގެ ސަބަބުން އެތަންތަން ވަނީ ވަރަށް ބޮޑަށް ހަޑިވެފައެވެ. މިކަމަށް ޙައްލެއް ހޯދުމުގެ ގޮތުން މި މަސައްކަތް ފަށާފައިވާކަމަށް ސްޓެލްކޯއިން ބުނެފައިވެއެވެ.
މި މަސައްކަތަކީ މާޙައުލު ސާފުތާހިރުކޮށް ބެލެހެއްޓުމަށް ސްޓެލްކޯއިން ކުރަމުންދާ މަސައްކަތްތަކުގެ ތެރެއިން އެއް މަސައްކަތް ކަމަށްވެސް އެ ކުންފުނިން ފާހަގަކޮށްފައިވެއެވެ. މި މަސައްކަތުގެ ސަބަބުން މާލޭގެ މަގުތަކުގެ ސާފުތާހިރުކަން އިތުރުވެ، ޢާންމު ރައްޔިތުންނަށް އުފާވެރި މާޙައުލެއް ޤާއިމުވެގެންދާނެ ކަމަށް ސްޓެލްކޯއިން އުންމީދުކުރެއެވެ.
ކޮމެންޓްސް (0)