މެސެޖިންގ ޕްލެޓްފޯމް ވަޓްސްއެޕްގެ ޗެނަލްތަކަށް އައު ފީޗަރެއް އިތުރުކޮށްފިއެވެ. މިގޮތުން އެންމެ ފަހުން އިތުރުކޮށްފައިވާ ފީޗަރަކީ ކިއުއާރު ކޯޑު މެދުވެރިކޮށް ޗެނަލްތައް ޝެއަރކޮށް، ބަލައި އަދި ފޮލޯ ކުރެވޭ ގޮތް ހެދުމެވެ.
މެޓާގެ ދަށުން ހިންގާ ވަޓްސްއެޕުން މި އައު ފީޗަރ ވަނީ ބީޓާ ވާރޝަންގައި ތަޢާރަފުކޮށްފައެވެ. މިހާރު މި ފީޗަރ ލިބެން ހުންނާނީ އައިއޯއެސް އަދި އެންޑްރޮއިޑް ޕްލެޓްފޯމްތަކުގެ އެންމެ ފަހުގެ ބީޓާ ވާރޝަންތަކުގައެވެ. އަދި ކުރިއަށް އޮތް ތަނުގައި ހުރިހާ ޔޫޒަރުންނަށް މި ފީޗަރ ލިބޭނެ ކަމަށް ލަފާކުރެވެއެވެ.
ފީޗަރ ޓްރެކަރ ވާބެޓާއިންފޯއިން ހާމަކުރި ގޮތުގައި، މި އައު ފީޗަރ ބޭނުންކުރުމަށް ބޭނުންވާނީ އެންމެ ފަހުގެ ބީޓާ ވާރޝަން އިންސްޓޯލްކޮށް، ވަޓްސްއެޕް ޗެނަލެއް މެނޭޖްކުރާ ފަރާތަކަށް ވުމެވެ. މިގޮތުން ޗެނަލްގެ މަޢުލޫމާތު ޕެނަލް ހުޅުވައި، ޝެއަރިންގ އޮޕްޝަންތަކުގެ ތެރެއިން ކިއުއާރު ކޯޑު އުފެއްދުމުގެ އިޚްތިޔާރު ލިބިގެންދާނެއެވެ.
މީގެ އިތުރުން، މި ކިއުއާރު ކޯޑުތައް އެހެން އެޕްލިކޭޝަންތަކަށްވެސް އެކްސްޕޯޓް ކުރެވޭނެއެވެ. މިކަމުގެ ސަބަބުން ޗެނަލްތަކުގެ މަޢުލޫމާތު ފަސޭހައިން ޝެއަރކޮށް، އިތުރު ފަރާތްތަކާ ހިއްސާކުރުމަށް ފަސޭހަވެގެންދާނެއެވެ.ވަޓްސްއެޕް ޗެނަލްތަކަކީ 2023 ވަނަ އަހަރު ތަޢާރަފުކުރެވުނު ފީޗަރެކެވެ. މި ފީޗަރގެ ޒަރީއާއިން ވިޔަފާރިތަކަށާއި، ޖަމްޢިއްޔާތަކަށާއި، އަދި އާންމު ފަރުދުންނަށް ގިނަ ބަޔަކާ އެއްފަހަރާ މުޢާމަލާތުކުރުމުގެ ފުރުސަތު ލިބިގެންދިޔައެވެ. ޗެނަލްތައް ތަޢާރަފުކުރި ފަހުން، ވަޓްސްއެޕުން ވަނީ މި ފީޗަރއަށް ގިނަގުނަ އިތުރު ކުރިއެރުންތަކެއް ގެނެސްދީފައެވެ. މީގެ ތެރޭގައި ޗެނަލްތަކުގައި ވޯޓު ނެގުމާއި، ވީޑިއޯ ޝެއަރކުރުމާއި، އަދި ގިނަ އެޑްމިނުން އިތުރުކުރުން ފަދަ ކަންކަން ހިމެނެއެވެ. މިފަދަ އައު ފީޗަރތައް އިތުރުކުރުމުގެ މަޤްޞަދަކީ ބޭނުންކުރާ ފަރާތްތަކަށް އިތުރު ފަސޭހަތަކެއް ފޯރުކޮށްދިނުމެވެ.
ކޮމެންޓްސް (0)