އިސްރާޢީލުގެ ފަތުރުވެރިން ރާއްޖެއަށް އައުން މިހާރުން މިހާރަށް ހުއްޓުވުމަށް ގޮވާލާ، މައްޗަންގޮޅި ދެކުނު ދާއިރާގެ މެމްބަރު ހައިތަމް އަހުމަދު، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުއަށް ސިޓީއެއް ފޮނުއްވައިފިއެވެ.
ހައިތަމްގެ މި ސިޓީގައި ވިދާޅުވެފައިވަނީ، އިސްރާޢީލުން ފަލަސްތީނުގައި ހިންގަމުންގެންދާ ލާއިންސާނީ ޢަމަލުތަކަކީ ސައްތައިން ސައްތަ މުސްލިމުންގެ ގޮތުގައި ރާއްޖެއިން އޮވެ ބަލައިގަނެވޭނެ ކަމެއް ނޫންކަމަށެވެ.
އިސްރާއީލުގެ ޔަހޫދީން ހިންގާ ލާއިންސާނީ ޖަރީމާއަކީ އިންސާނީ ހައްޤާއި ކަރާމާތާއި ދެކޮޅު ޢަމަލެއްގެ ގޮތުގައި ސިފަކުއްރައްވާ ހައިތަމް ވިދާޅުވީ، އިސްރާއިލުން ދެމުންދާ ޙަމަލާތަކުގައި ފަލަސްތީނުގެ އެތައް ތުއްތު ކުދިންނާއި އާއްމު ރައްޔިތުން ޝަހީދުކޮށްލާ މުޅި އުމުރަށް ނުކުޅެދޭ ރެފިއުޖިންނަށް ހަދާފައިވާކަމަށެވެ.
ހައިތަމް ވިދާޅުވީ ފާއިތުވެ ދިޔަ 10 ދުވަސްވެފައިވަނީ މި އަނިޔާވެރިކަން އިންތިހާއަށް ބޮޑެވެގެންދިޔަ ދުވަސްތަކެއް ކަމަށެވެ. އަދި ފެނާއި ކަރަންޓު ފަދަ ޟަރޫރީ ޚިދުމަތްތަކުން މަޙްރޫމުކޮށް، 2 މިލިއަނަށްވުރެ ގިނަ މުސްލިމުން ފަލަސްތީނުގައި ތާށިކޮށް ނެތިކޮށްލަށް މަސައްކަތް ކުރި ދުވަސްތަކެއްކަމަށްވެސް ހައިތަމް ވިދާޅުވެފައިވެއެވެ.
ފަލަސްޠީނަކީ މުސްލިމުންގެ އެންމެ ފުރަތަމަ ޤިބްލަ ކަމުގައިވާ މަސްޖިދުލް އަޤްޞާވެސް ހިމެނޭ އެންމެހާ މުސްލިމުން ނުހަނު ލޯބިވާ މުޤައްދަސު ބިންކަން ވަނީ ފާހަގަކުރައްވާފައެވެ.
އެހެންކަމުން އެފަދަ ބިމަކަށް ޙަމަލާދީ އިސްރާއީލުގެ ޔަހޫދީން މިހިންގާ ލާއިންސާނީ ޢަމަލުތައް ކުއްވެރިކުރައްވާކަމަށް ވަނީ ވިދާޅުވެފައެވެ. އެފަދަ ޤައުމެއްގެ ޕާސްޕޯޓުގައި ޗުއްޓީ ހޭދަކުރުމުގެ ނަމުގައި މި ސައްތައިން ސައްތަ މުސްލިމް ޤައުމަށް އައުމަކީ އިންތިޙާއަށް ކަންބޮޑުވެ ބިރުގަންނަންޖެހޭ ކަމެއްކަމަށް ހައިތަމް ވިދާޅުވިއެވެ. އެހެންކަމުން ދިވެހިރާއްޖޭގެ މުއްސަސާތަކުން ވީ އެންމެ އަވަހަކަށް އިސްރާޢީލުގެ ޕާސްޕޯޓާއި، އިސްރޭލުގެ ފަތުރުވެރިން ރާއްޖެއަށް އައުން މިހާރުން މިހާރަށް ހުއްޓުވުމަށް ހައިތަމް ވަނީ ގޮވާލައްވާފައެވެ. އަދި މި މައްސަލަ ޚާރިޖީ ކޮމިޓީން ބައްލަވައިދެއްވުމަށް، މަޖިލިހުގެ ރައީސް، ރައީސް މުޙައްމަދު ނަޝީދަށް ހައިތަމް ފޮނުއްވެވި ސިޓީގައި ވަނީ އެދިވަޑައިގެންފައެވެ..
މަސްދަރު: ޕީއެސްއެމް ނިއުސް
ކޮމެންޓްސް (0)