މެލޭޝިއާގައި ހުންނަ އޭޝިއާ ބެޑްމިންޓަން އެކެޑަމީ ކޮމްޕްލެކްސްގައި އައްޑޫ ސިޓީގެ 11 ދަރިވަރަކު ތަމްރީނުވާން ފަށައިފިއެވެ.
މިއީ އައްޑޫގައި ބެޑްމިންޓަން ކުރިއެރުވުމަށް މަސައްކަތްކުރާ އެމްސްޕޯޓްސް އާއި ހޮރައިޒަން އެކެޑަމީގައި ތަމްރީން ހޯދާ ދަރިވަރުންނަށް، އެ ފަރާތުން ފަހިކޮށްދެއްވި ފުރުސަތެކެވެ. އެގޮތުން އައްޑޫގެ ހަތަރު ސްކޫލަކަށް ނިސްބަތްވާ ދަރިވަރުން މި ތަމްރީނުގައި ބައިވެރިވެއެވެ. އެއީ ފޭދޫ ސްކޫލުގެ ހަތަރު ދަރިވަރަކާއި، ހިތަދޫ ސްކޫލުގެ ދެ ދަރިވަރުންނާއި، ޝަރަފުއްދީން ސްކޫލުގެ ދެ ދަރިވަރަކާއި، ބިލަބޮން ހައި އިންޓަނޭޝަނަލް ސްކޫލް އައްޑޫ ކެމްޕަސްގެ ތިން ދަރިވަރުންނެވެ.
ފަނަރަ އަހަރުގެ ކޯޗިން ތަޖުރިބާއާއެކު އައްޑޫގައި ބެޑްމިންޓަން ދަސްކޮށްދެމުން އަންނަ އެމް ސްޕޯޓްސްގެ ފައުންޑަރ މުޙައްމަދު އައްފާންވެސް ވަނީ މި ދަރިވަރުންނާއެކު މެލޭޝިއާއަށް ފުރާފައެވެ. މި ތަމްރީން ޕްރޮގްރާމާއި ގުޅޭގޮތުން އައްފާން ވިދާޅުވީ އެއް މަސް ދުވަހަށް މެލޭޝިއާގައި ކުރިއަށްދާ މި ޕްރޮގްރާމުގެ ސަބަބުން ބައިވެރިންނަށް ބެޑްމިންޓަންގެ ދާއިރާއިން އިތުރު ތަމްރީނާއި ފުރުސަތު ލިބި ދަރިވަރުންގެ ކުޅުމުގެ ފެންވަރު އިހުނަށްވުރެ ރަނގަޅުވެގެންދާނެ ކަމަށް އުއްމީދު ކުރާ ކަމަށެވެ.
ރާއްޖޭގެ އިތުރުން، އިންޑިއާ، ރަޝިއާ، ޗައިނާ އަދި މެލޭޝިއާގެ ދަރިވަރުން މި ޕްރޮގްރާމުގައި ބައިވެރިވާ ކަމަށާއި، އެހެންކަމުން މިހާރު ދަރިވަރުންނަށް ލިބިފައިވާ ހުނަރުގެ އިތުރުން އިތުރު ކަންކަން އެކުދިންނަށް ދަސްވުމުގެ ފުރުސަތު ބޮޑު ކަމަށް އައްފާން ވިދާޅުވިއެވެ. އަދި މިއީ ދަރިވަރުންގެ ހިތްތަކުގައި މި ކުޅިވަރަށް ޝައުގު އުފެދި، އަދި ކުދިންގެ ފަރާތުން އައްޑޫ އާއި އަދި މުޅި ރާއްޖެއަށްވެސް ބެޑްމިންޓަނުގެ ތެރެއިން ކުރިއެރުމާއި ކާމިޔާބީ ހޯދައިދިނުމުގެ ފުރުސަތު ފަހިވެގެންދާނެ ކަމެއް ކަމަށްވެސް އައްފާން ވިދާޅުވިއެވެ.
މަސްދަރު : ޕީއެސްއެމް ނިއުސް
ކޮމެންޓްސް (0)