ޔުއެފާ ނެޝަނަލް ލީގް ފައިނަލުގައި ޕެނަލްޓީ ޖަހައިގެން ކްރޮއޭޝިޔާ ބަލިކޮށް މުބާރާތުގެ ޗެމްޕިއަންކަން ސްޕެއިން ހޯދައިފިއެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ފުރަތަމަ ހާފުގެ 12 ވަނަ މިނެޓުގައި ސްޕެއިންގެ ޒުވާން މިޑްފިލްޑަރ ގަވީ އަށް ލިބުނު ހުސް ފުރުސަތެއްގައި އޭނާ ފޮނުވާލި ހަމަލާ ގޯލާއި އަމާޒުނުވެ ދިޔައީ ދަނޑިކައިރިން ބޭރަށެވެ.
ފުރަތަމަ ހާފުގައި ކްރޮއޭޝިޔާ ޓީމުން އެންމެ ހުސް ފުރުސަތެއް ލިބުނީ އެޓީމުގެ އިވާން ޕެރިސިކް އަށެވެ. 31 ވަނަ މިނެޓުގައި ސްޕެއިންގެ ޕެނަލްޓީ އޭރިއާ ތެރެއިން ލިބުނު މިފުރުސަތެއްގައި ޕެރިސިކް ބޮލުން ފޮނުވާލި ހަމަލާ ސްޕެއިންގެ ކީޕަރު އުނައި ސިމޯން ވަނީ ހުޝިޔާރުކަމާއެކު ދިފާއުކޮށްފައެވެ.
ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.
ދެވަނަ ހާފުގައި ވެސް ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔައިރު، 65 ވަނަ މިނެޓުގައި ސްޕެއިންގެ މިޑްފީލްޑަރު ރޮޑްރީ ކްރޮއޭޝިޔާގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލާއި އަމާޒުނުވެ ދިޔައީ ދަނޑިކައިރިން ބޭރަށެވެ.
އަދި 84 ވަނަ މިނެޓުގައި ސްޕެއިންގެ ޒުވާން ފޯވާޑް އަންސޫ ފާޓީ އަށް މެޗުގެ ލީޑު ނެގުމަށް ވަރަށް ހުސް ފުރުސަތެއް ލިބިފައިވެއެވެ. ކްރޮއޭޝިޔާގެ ޕެނަލްޓީ އޭރިއާ ތެރެއިން ލިބުނު މިހުސް ފުރުސަތުގައި އޭނާ ފޮނުވާލި ބޯޅަ އެޓީމުގެ ޑިފެންޑަރަކު ވަނީ ބްލޮކް ކޮށްފައެވެ.
މެޗުގެ 90 މިނެޓުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.
ފައިނަލް މެޗުގެ ނަތީޖާ ނެރުމަށްޓަކައި ކުޅެވުނު އިތުރު ވަގުތުގެ 15 މިނެޓުގެ ދެ ހާފުގެ ކުޅުން ނިމިގެންދިޔައީވެސް ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެގެންނެވެ.
މެޗުގެ ނަތީޖާ ނެރުމަށްޓަކައި ޖެހި ޕެނަލްޓީގައި ސްޕެއިނުން ފޮނުވާލި ހަ ޕެނަލްޓީގެ ތެރެއިން ފަސް ޕެނަލްޓީ އެޓީމުން ކާމިޔާބުކުރިއިރު، ކްރޮއޭޝިޔާގެ ހަ ޕެނަލްޓީގެ ތެރެއިން އެޓީމަށް ކާމިޔާބު ކުރެވުނީ ހަތަރު ޕެނަލްޓީ އެވެ. ކްރޮއޭޝިޔާގެ ލޮވްރޯ މާޖަރ އަދި ބްރޫނޯ ޕެޓްކޮވިޗް ފޮނުވާލި ޕެނަލްޓީތައް ސްޕޭންގެ ކީއްޕަރު އުނައި ސިމޯން ވަނީ ދިފާއުކޮށްފައެވެ.
ސްޕެއިންގެ ޓީމުން ނާކާމިޔާބު ވީ ޑިފެންޑަރު އެމެރިކް ލަޕޯޓް ފޮނުވާލި ޕެނަލްޓީ އެވެ.
ސްޕެއިން މި މުބާރާތް ކާމިޔާބު ކުރުމާއެކު އެޓީމު ވެގެންދިޔައީ ޔުއެފާ ނެޝަނަލް ލީގް ތައާރަފް ކުރި ފަހުން މި މުބާރާތް ކާމިޔާބު ކުރި ތިންވަނަ ޓީމަށެވެ.
މީގެ ކުރިން މި މުބާރާތް ކާމިޔާބުކޮށްފައިވަނީ ޕޯޗުގަލްގެ އިތުރުން ފްރާންސް އެވެ.
ސްޕެއިން އަކީ އެންމެ ފަހުން 2021 ވަނަ އަހަރު ބޭއްވުނު މިމުބާރާތު ރަނަރަޕް ޓީމެވެ. އަދި މިއީ 2012 ވަނަ އަހަރުގެ ޔޫރޯ ކާމިޔާބުކުރި ފަހުން ބޮޑު މުބާރާތެއްގެ ޗެމްޕިއަންކަން ސްޕެއިން އިން ހޯދި ފުރަތަމަ ފަހަރެވެ.
ކޮމެންޓްސް (0)