އައްޑޫ ސިޓީން ފެނުނު ހިމަބިހި (މީސަލްސް) ކޭސްއާއި ގުޅިގެން ކޮންޓެކްޓްވި މީހުންގެ ގޮތުގައި ފާހަގަކުރެވިފައިވާ އެއްވެސް މީހެއްގެ ފަރާތުން ބަލީގެ އަލާމާތެއް ފެނިފައިނުވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން ބުނީ މި ކޭސް އާއި ގުޅިގެން ކޮންޓެކްޓްވި 65 ފަރާތެއް ފާހަގަވެފައިވާކަމަށާއި، މިއިން އެއްވެސް މީހެއްގެ ގައިން ބަލީގެ އަލާމާތެއް ފެނިފައިނުވާ ކަމަށެވެ. ކޮންޓެކްޓްވި އެންމެންނަކީވެސް ހިމަބިއްސާއި ދެކޮޅަށްދޭ ވެކްސިން ފުރިހަމަކޮށްފައިވާ ފަރާތްތަކެއް ކަމަށް އެޗްޕީއޭއިން ބުނެއެވެ.
އެޗްޕީއޭއިން ވަނީ ކަނޑައެޅިފައިވާ އުސޫލާއި އެއްގޮތަށް ކޭސް ފެނުނު ސަރަހައްދުގައި ކޮމިއުނިޓީ ސާވޭއެއް ކުރިޔަށް ގެންގޮސްފައެވެ. މި ސާވޭ ކުރިޔަށް ގެންގޮސްފައިވަނީ 16 ގެއަކާއި 1 ފިހާރަ ހިމެނޭ ގޮތަށް ކަމަށް އެޗްޕީއޭއިން ބުނެއެވެ. އަދި މީސްލްސްގެ ވެކްސިންގެ ދެވަނަ ޑޯޒު ފުރިހަމަނުވެ ތިބި އަދި ފުރިހަމަކޮށްފައިވާކަމުގެ ރެކޯޑް ނެތް މީހުންނަށް ވެކްސިން ދިނުމަށް ރިންގް ވެކްސިނޭޝަނެއް ކުރިޔަށްގެންގޮސް، 19 މީހަކަށް ވެކްސިން ދީފައިވާ ކަމަށް އެޗްޕީއޭއިން ބުނެއެވެ.
ހިމަބިއްސަކީ ރާއްޖެއިން ނައްތާލެވިފައިވާ ބައްޔެއް ކަމަށް ކަނޑައަޅާފައިވާ ބައްޔެކެވެ. އެހެންކަމުން އެޗްޕީއޭގެ ސަވައިލެންސް މިންގަނޑުތަކާއި އެއްގޮތަށް ރާއްޖޭގައި ސިއްހީ ހިދުމަތްދޭ ހުރިހާތަނަކުންގެސް އަމަލު ކުރަމުން އަންނަ އުސޫލުގެ ދަށުން، ހިމަބިހީގެ އަަލާމާތްތައް ހުރެގެން ޑޮކްޓަރަށް ދައްކާ ފަރާތްތައް ހިމަބިއްސަށް ޓެސްޓު ކުރުމަށް ސާމްޕަލް ނަގައެވެ.
ކޮމެންޓްސް (0)