ކޮވިޑު ޖެހޭ މީހުންގެ އަދަދު މައްޗަށް

ރާއްޖޭގައި ކޮވިޑު ޖެހޭ މީހުންގެ އަދަދު އިތުރުވާން ފަށައފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު އާންމުކުރި ތަފާސް ހިސާބުތަކުން ދައްކާ ގޮތުން މިދިޔަ މަހުގެ 26 އިން މި މަހުގެ އެއްވަނަ ދުވަހުގެ ނިޔަލަށް 39 މީހަކު ވަނީ ކޮވިޑަށް ޕޮޒިޓިވްވެފައެވެ.

މީއީ މިދިޔަ ނޮވެމްބަރަށްފަހު ހަފުތާއެއްގެ ތެރޭގައި ކޭސްތައް އިތުރުވި ފުރަތަމަ ފަހަރެވެ.

ތަފާސް ހިސާބުތަކުން ދައްކާ ގޮތުން މިދިޔަ މަހުގެ 19 ވަނަ ދުވަހުން 25 ވަނަ ދުވަހުގެ ނިޔަލަށް ރިޕޯޓުކުރީ 16 ކޭސްއެވެ. އޭގެ ކުރީގެ ހަފުތާގައި 11 ކޭސް ރިޕޯޓުކުރިއިރު, އެ މަހުގެ ފުރަތަމަ ހަފުތާގައި ރިޕޯޓުކުރީ 06 ކޭސްއެވެ.

މިދިޔަ ހަފުތާގައި އިތުރުވި ކޭސްތަކާއެކު ރާއްޖެއިން މިހާތަނަށް 185,810 ކޭސް ވަނީ ރިޕޯޓުކުރެވިފައެވެ. މިހާތަނަށް ނިޔާވީ 311 މީހުންނެވެ.