ކޯޓަކުން ކުރި އެންމެ ހަލާލު ހުކުމަކީ ޔާމީނަށް ކުރި ހުކުމް: ރޮޒޭނާ

ރައީސް ޔާމީނަށް ކުރި ހުކުމަށްވުރެ ހަލާލް ހުކުމެއް މިރާއްޖޭގެ ތާރީހުގައިވެސް ނުކުރާކަމަށް އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވިއެވެ.

ރޮޒައިނާ މިހެން ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި އެމްޑީޕީގެ ރިޔާސީ ޓިކެޓު ހަވާލުކުރުމަށް ރޭ ކާނިވާ ސަރަހައްދުގައި ބޭއްވި ޖަލްސާގައި ވާހަކަ ދައްކަވަމުންނެވެ.

ރިޔާސީ ޓިކެޓް ރައީސް ޞާލިހަށް އެރުވި ޖަލްސާގައި ވާހަކަ ދައްކަވަމުން ރޮޒޭނާ ވިދާޅުވީ ދައުލަތުގެ މާލިއްޔާއިން އެތައް މިލިޔަން ރުފިޔާ އަމިއްލަ އެކައުންޓުގައި ބަހައްޓައިގެން ވެރިކަން ކުރެއްވި މީހަކު ކުރެއްވި އެކަމަކީ އެއީ ހިޔާނާތެއް ނޫންކަމަށް ހަދަން އުޅުނަސް އެކަންއެހެން ނުވާނެކަމަށެވެ. ރައީސް ޔާމީނަށް ކޮށްފައިވާ ހުކުމަށް އިޝާރާތް ކުރައްވާ ރޮޒޭނާ ވިދާޅުވީ އެހުކުމަކީ ހަރާމް ހުކުމެއްކަމަށް އިދިކޮޅު ފަރާތްތަކުން ވިދާޅުވި ނަމަވެސް އެއަަށްވުރެ ހަލާލު ހުކުމެއް ކޯޓަކުން ނުކުރާކަމަށެވެ.

ރައީސް ޔާމީންގެ ވެރިކަމުގައި ހިންގި އެތައް ވައްކަމެއްގެ މައްސަލައެއް ނުބަލައި ދޫކޮށްލުމަކީ އިންސާފެއް ނޫންކަމަށް ރޮޒޭނާ ވިދާޅުވެ ވާހަކަ ދައްކަވަމުން ރޮޒެއިނާ ވިދާޅުވީ އާދައިގެ ރިހާކުރު ފުޅިއެއް ވަގަށް ނަގާ މީހާ ޖަލަށްލާން ހުކުމް ކުރާނަމަ ދައުލަތުން ވައްކަން ކުރާ މީހުންވެސް ޖަލަށް ލެވެން ޖެހޭކަމަށެވެ.

މިއަދު އަޅުގަނޑުމެންނަށް އެންމެ ބާރަށް އިވޭ ވާހަކައަކީ ރައީސް ޔާމީނަށް ކުރީ ހަރާމް ހުކުމެއްގެ ވާހަކަ. ބައްލަވާ ނިކަމެތި މީހާ ރިހާކުރުފުޅިއެއް ވަގަށް ނެގީމަ އެކަންޏެއް ނޫން އިނގޭތޯ ޖަލަށް ލާން ޖެހެނީ . ގައުމުގެ ވެރިޔާ ރައްޔިތުންގެ ފައިސާ އަށް ރައްކާތެރިވާނެކަމަށް ހުވާކޮށްގެން ވެރިކަމަށް އައިސް ވައްކަން ކުރީމަ އެންމެ ފުރަތަމަ ޖަލަށް ލާންޖެހެނީ ހަމައެމީހާ. އޭގެ ފަހުން ދެން ކުދި ވަގުންތައް ހޯދާނީ.

– ރޮޒޭނާ ވިދާޅުވިއެވެ.