ފައިދާ ގޯލްގެ ތަފާތުން މީދޫ ކަޓުވާލައި ހިތަދޫ ފައިނަލަށް

އައްޑޫ ޔޫތު ޗެލެންޖް 2020 ފުޓްބޯޅަ މުބާރާތުގެ ފައިނަލަށް ހިތަދޫ އެފްސީ ދަތުރުކޮށްފިއެވެ.

މީދޫގައި ކުރިއަށްދާ  މިމުބާރާތުގައި ހިތަދޫޓީމާއި މީދޫޓީމް ކުޅެންޖެހޭ މެޗްތައް ކުޅެނިމިފައިވާއިރު  ހިތަދޫއާއި  މީދޫޓީމަށްވެސް  ލިބެނީ 10 ޕޮއިންޓެވެ. ހިތަދޫޓީމަށް މީދޫޓީމަށްވުރެ ކުރިލިބި ފައިނަލްގެ ފުރުސަތު ހިތަދޫ ޓީމަށް ލިބެނީ ފައިދާ ގޯލްގެ ތަފާތުންނެވެ.

ހިތަދޫޓީމަށް 10 ޕޮއިންޓް ލިބި ފައިދާ ގޯލްގެ ތަފާތުން ފައިނަލްގެ ފުރުސަތު ލިބުނީ އިއްޔެ ހަވީރު ހިތަދޫ އެފްސީ ޖޫނިއާސްއާއި ބައްދަލުކޮށް ކުޅުނުމެޗް 5-0 ގެ ނަތީޖާއަކުން މޮޅުވެ ލިބުނު 3 ޕޮއިންޓާއެކުގައެވެ.

މިމުބާރާތުގެ ފައިނަލްގައި ހިތަދޫއާއި ވާދަކުރާޓީމެއް އެގޭނީ މިއަދު ހަވީރު ފޭދޫއާއި މަރަދޫޓީމް ބައްދަލުކުރާ މެޗްގެ ނަތީޖާ ނިކުންނަ ގޮތަކުންނެވެ. މިމެޗު އެއްވަރުގެން ނިމިއްޖެނަމަ 11 ޕޮއިންޓް ލިބިގެން ފައިނަލަށް ހޮވޭނީ މަރަދޫޓީމެވެ. މިމެޗުން ފޭދޫޓީމް މޮޅުވެއްޖެނަމަ ފޭދޫޓީމަށާ މަރަދޫޓީމަށް އަދި މީދޫޓީމަށްވެސް ލިބޭނީ 10 ޕޮއިންޓެވެ. އެހެންނަމަވެސް ފައިދާ ގޯލްގެ ތަފާތުން ފައިނަލަށް ހޮވޭނީ ފޭދޫޓީމެވެ.